Os xulgados de Vilagarcía camiñan cara o "colapso", con vistas civís para xuño de 2025

O decano do Colexio de Procuradores de Pontevedra, Joaquín Gabriel Santos Conde, alerta de que a situación do partido xudicial de Vilagarcía de Arousa "camiña cara ao colapso". Nun comunicado, apunta que os informes estatísticos publicados acreditan que o volume de entrada anual de asuntos neste partido xudicial, na xurisdición civil, supera en máis dun 40 % o módulo teórico establecido polo Consello Xeral do Poder Xudicial.

"A publicación do Real Decreto 1170/2023, de 27 de Decembro, de creación de 70 unidades xudiciais e adecuación da planta xudicial, constata que, unha vez máis, non se atenderon as necesidades que presenta o Partido Xudicial de Vilagarcía de Arousa", lamenta. Así, asegura que esta é unha "realidade que perdura máis dunha década e que xustifica, a máis diso outros factores como o nivel de poboación, a realidade socioeconómica e a complexidade da litixiosidade, a creación dunha nova unidade xudicial en Vilagarcía de Arousa".

"Non nos achamos ante unha problemática meramente conxuntural que poida resolverse con medidas temporais de reforzo de persoal, senón ante un déficit estrutural de carencia das unidades xudiciais necesarias para dar cumprida resposta ao volume e complexidade dos asuntos que rexistra este partido xudicial", deixa claro.

De feito, o decano dos procuradores pontevedreses avisa de que hai sinalamento de vistas civís para xuño de 2025, "o que evidencia unha dilación procedimental absolutamente inaceptable". Por todo iso, o Colexio de Procuradores de Pontevedra adhírese á petición cursada polo Tribunal Superior de Xustiza de Galicia e a Comisión Mixta de Xustiza pola que se demanda a creación dun cuarto Xulgado Mixto no partido xudicial de Vilagarcía.

Detido xulgado no Xulgado de Instrución número 1 de Vilagarcía de Arousa, a 23 de novembro de 2022 | Fonte: Gustavo de la Paz - Arquivo