Acusados de pertencer á rede de Sito Miñanco din non saber nada do intento de introducir 3,3 toneladas de cocaína no 2017

Unha vintena de acusados no xuízo que se segue na Audiencia Nacional contra o narcotraficante galego José Ramón Prado Bugallo, coñecido como Sito Miñanco, negaron a preguntas fundamentalmente dos seus avogados ter relación coas operacións de tráfico de droga que se axuizan nin co branqueo de diñeiro procedente da droga ou o transporte do mesmo. Nesta nova sesión do xuízo, no que a Sección Terceira da Sala do Penal xulga tamén ao avogado Gonzalo Boye por presuntamente tentar recuperar para a organización de Sito Miñanco unha cantidade intervida no aeroporto de Barajas, declararon, entre outros David Pérez Lago, que segundo a Fiscalía era un dos homes de confianza do 'narco' galego, e unha das súas parellas, Leonor Ivanova Pérez.

Pérez Lago, que segundo o Ministerio Público se atopaba nun terceiro chanzo da organización, defendeu a legalidade dos negocios que levaba no período investigado, entre 2016 e 2018, e xustificou o seu movemento de diñeiro en efectivo porque a súa empresa 'Adegas Eslaga' cobraba pedidos en metálico. Ademais, sostivo que nos días craves de outubro de 2017 nos que se abordou o buque Thoran, que transportaba 3,3 toneladas de cocaína, el estaba a realizar envíos da súa adega e recollendo unha partida de nacemento no rexistro civil polo seu fillo.

"VENDÍA MÓBILES ENCRIPTADOS"

Outro dos acusados de relevancia, Raymond Van Rij, un cidadán de orixe holandesa afincado en Marbella que presuntamente se asociou con Prado Bugallo porque "tamén dispuña dunha armazón criminal", explicou que el só se dedicou á venda de teléfonos encriptados e que Sito Miñanco tan só era un bo cliente seu ao que forneceu non menos de 50 teléfonos. Neste sentido, a preguntas do seu avogado sostivo que "nunca" pregunto ao 'narco' a que se dedicaba, foise desligado dun colector con 615 quilos de cocaína que foi aprehendido en Países Baixos, dixo descoñecer nada relativo ao Thoran e, en definitiva, lamentou estar "no momento equivocado no sitio equivocado".

Pola súa banda, José Antonio González Varela, presuntamente home de confianza de Juan Antonio Fernández Fernández (de máxima confianza de Sito Miñanco) só respondeu ao seu defensa e negou calquera relación co tráfico de droga. José Manuel Ferradas, ao que o Ministerio Público sitúa como outro dos homes de confianza de Sito Miñanco e que participaría tanto nas operacións de introdución de sustancia estupefaciente como nas actividades encamiñadas á ocultación do diñeiro produto desta actividade criminal, negou todo e salientou que el sempre se gañou a vida co seu barco pesqueiro. Si recoñeceu ter relación con Prado Bugallo, eran amigos e tiñan "unha confianza xa de anos" porque as súas familias se coñecían por ser todos mariñeiros.

ACOMPAÑABA A PRADO BUGALLO

Leonor Ivanova Pérez, á que a investigación sitúa como a persoa que acompañaba en 2017 regularmente ao 'narco' nos seus desprazamentos e que estaba ao corrente das operacións de introdución de droga e tiña capacidade de decisión, este mércores negou os feitos que se lle imputan. Si recoñeceu que acompañaba á súa parella, Sito Miñanco, en diversos desprazamentos pero non para mover diñeiro. No día de hoxe declarou tamén Marcos Prado, considerado polos investigadores como un dos expertos pilotos de embarcacións que poderían colaborar na introdución da droga en costas españolas de frutificar a operación do buque Thoran. Este, a preguntas do seu avogado sostivo que eses días de outubro de 2017 estivo a xogar un partido de fútbol e logo estivo tamén ingresado no hospital. Negou ademais conducir lanchas e moito menos ser piloto dese tipo de embarcacións rápidas. Tamén declarou este mércores Ramiro Somoza, ao que a Policía identifica co alias de 'Conde' e do que se sinala que tamén era experto piloto de embarcacións, "participando decisivamente na execución das operacións de introdución da sustancia estupefaciente transportada por un buque 'abastecedor' a través doutras embarcacións á costa española". Con todo, ao seu avogado sinaloulle que nunca se lle coñeceu como 'Conde', que se coñecía a Prado Bugallo era porque sempre foron veciños e que descoñecía calquera tipo de plan para introducir droga por medio dun buque. 

O narcotraficante galego, José Ramón Prado Bugallo (3d), coñecido como Sito Miñanco, á súa chegada á Audiencia Nacional, a 18 de novembro de 2024, en San Fernando de Henares, Madrid | Fonte: Gustavo Valiente - Arquivo

Pola súa banda, Jaime Albert Brunet, que era propietario da mercantil Astec Naútica e que, segundo a Fiscalía forneceu á rede do 'narco' "motores e distintas pezas para as embarcacións, como un jockey ou flotadores, que as operacións ilícitas requiría", sinalou que a súa relación con dous dos investigados foi estritamente profesional. Lembrou que lles vendeu un flotador, tres motores Yamaha e un jockey ("que é un sitio para sentar, non hai máis finalidade"), e que por iso se lle abonou en efectivo 95.000 euros en diferentes pagos. Sobre un teléfono encriptado que a organización lle facilitou, sinalou que llo deron para que o probase pero que a el non lle gustaba levar dous móbiles e non o utilizou. Alirio Tovar, ao que se sitúa co sobrenome de 'Sarko, Rigor ou Roberto' e como representante da organización subministradora da droga, explicou que se dedicaba á explotación e compravenda de esmeraldas, e apuntou que se viaxou a España en 2017 en realidade foi para visitar a unha irmá enferma.

O CAPITÁN DO THORAN

Hashim Garibaldi, de nacionalidade acerbaixana e capitán do buque Thoran, explicou que na teoría levábao el pero na práctica non. Engadiu que no seu contrato fixábase que só iría polo Mar Mediterráneo e o Mar Negro e que faría labores de remolque dun barco de Orán ata Istambul, e sen emabrgo acabaron navegando cara a Brasil. Negou coñecer con antelación a ninguén da tripulación, salvo a outro dos procesados, e explicou que o seu plan de traballo era o descrito, e que nese labor estragóuselles o piloto automático e que por iso se dirixiron a outro porto onde, tras arranxar a avaría volveron dirixirse ao seu destino. Sobre o esquema do barco, explicou que o revisou pero nos planos non constaba un tanque baleiro que existía e que servía de protección para separar a sala de máquinas do lugar onde se alberga o combustible, lugar onde se achou a droga. Ademais, descargou toda responsabilidade de comunicación cos contratistas nunha terceira persoa de orixe turca que tamén consta como procesado no xuízo, Seit Ali Ai.

Sobre cando sospeitou que había algo "raro", sinalou a súa defensa que foi cando tras encher en Canarias achegáronse a Dakar, algo non programado. Tras avisar de que tiñan que comunicar o cambio, dixéronlle que outros se encargaban e tras isto dirixíronse rumbo a Brasil. Tamén lembrou que, nun momento dado da travesía, un barco con xente armada achegouse ao seu buque e tras ser abordados empezaron a lanzar "sacos cadrados" cara ao Thoran. Tras isto, indicou que Seit Ali comunicouse con alguén ao que dixo que "o peixe está servido". Sostivo que non soubo onde se colocaron eses sacos. Logo, comentou, o Thoran colleu a ruta de volta polo Caribe cara a Portugal pero antes foi abordado pola Policía. O escrito de acusación de Fiscalía sostén que todos os tripulantes "coñecían e participaran no almacenamento, ocultación e transporte da sustancia estupefaciente coa finalidade de proceder posteriormente ao seu transvasamento a outras embarcacións".