Nova convocatoria da liña de axudas para o asentamento de emigrantes retornados
Co obxectivo de axudarlles a afrontar os gastos excepcionais que supón o seu asentamento na comunidade.
Por Europa Press / Redacción | SANTIAGO DE COMPOSTELA | 25/01/2024 | Actualizada ás 20:25
O Goberno galego autorizou o impulso dunha nova convocatoria da liña de axudas extraordinarias a emigrantes galegos retornados, dentro da Estratexia Galicia Retorna, co obxectivo de axudarlles a afrontar os gastos excepcionais que supón o seu asentamento na comunidade. Cun orzamento global de 2 millóns de euros, esta partida vai dirixida a apoiar a estas persoas retornadas nos gastos excepcionais derivados de asentarse na nosa comunidade.
A Xunta destacou que o fomento do retorno dos galegos e galegas do exterior é unha das liñas estratéxicas do Executivo autonómico para facer fronte ao reto demográfico, non só como unha cuestión poboacional, senón tamén para "sumar talento e enriquecer o tecido empresarial con profesionais de ampla experiencia e formación".
O importe da axuda establécese en función das condicións e características sociais da familia, ata chegar a un límite de 6.000 euros, xa que se incrementa a axuda se a familia reside nun concello rural; as condicións de réxime da vivenda; e en función do número de fillos.
Os principais países de orixe das persoas beneficiarias son, segundo os datos dos últimos anos, Suíza, Alemaña, Francia, Reino Unido, Venezuela, Arxentina, Brasil, Cuba, Uruguai, México, Estados Unidos e Chile. A maioría dos beneficiarios eran fillos de nados en Galicia, aínda que o Executivo galego sostén que se está percibindo un aumento no número de netos retornados.
