O PP sobre a manifestación en defensa da sanidade: "Estamos tranquilos, as persoas que a necesitan están atendidas"

A secretaria xeral do PPdeG e candidata pola Coruña, Paula Prado, considera "absolutamente politizada" a manifestación da Plataforma SOS Sanidade Pública convocada para este domingo en Santiago de Compostela.

Preguntada polos xornalistas no transcurso dunha visita aos preparativos do mitin central do PP na praza de touros de Pontevedra que terá lugar este sábado, Paula Prado sinalou que "hai unha mobilización e unha manipulación por parte dos partidos de esquerda".

Paula Prado asegurou que existe "un correo electrónico que circula por aí", no que "se ve como todas as forzas políticas puxéronse de acordo para sufragar esta manifestación". "Sufragan autobuses, sufragan o palco, sufragan a megafonía", apostilou.

"Non é unha manifestación que xurda dunha necesidade da sociedade civil", sostivo a secretaria xeral do PPdeG que fixo tamén referencia á recente marcha en Santiago en defensa do mar e contra a xestión da Xunta da vertedura dos 'pellets' "na que "a xente non participou tanto".

"Nós estamos tranquilos, sentimos que as persoas que necesitan a sanidade pública están atendidas", dixo Prado. "Non se se buscar réditos políticos nisto vailles a ser rendible", apuntou en relación ás formacións políticas "de esquerda".

Así, fixo fincapé en que "a sanidade de galega é no barómetro sanitario unha das sanidades das comunidades autónomas máis valoradas de España" unha cualificación que "non é do Partido Popular, senón que é o que din os datos do Ministerio".

Tras recoñecer que "hai persoas que ás veces sofren algún atraso na atención sanitaria", Paula Prado indicou que iso é debido á falta de médicos "e iso depende do goberno de España" mentres que "o que está a facer o goberno da Xunta en materia de sanidade é extraordinariamente bo".

A secretaria xeral do PP galego, Paula Prado. Raúl Lomba - Europa Press - Arquivo