Lorenzo Amor (ATA) defenderá estender aos autónomos o subsidio por desemprego a maiores de 52 anos
Por E.P. | SANTIAGO DE COMPOSTELA | 04/02/2024 | Actualizada ás 15:20
O presidente da Asociación de Traballadores Autónomos (ATA) e vicepresidente da CEOE, Lorenzo Amor, avanzou que Cepyme e ATA defenderán que a reforma do subsidio por desemprego inclúa a extensión a maiores de 52 anos aos autónomos.
Nunha entrevista na Radio Galega recollida por Europa Press, Amor lamentou que este tema se levase ao Congreso "sen negociar" e que posteriormente fose "tombado parlamentariamente". "Agora dinnos que se quere negociar. Isto é un diálogo social de segundo prato", reprochou.
Cuestionado pola petición do PNV de que prevaleza o convenio autonómico, Lorenzo Amor opinou que é "unha deslealdade ao diálogo social". "Cando se chega a un acordo, chégase para que perdure no tempo", manifestou, antes de lembrar que o Executivo "pactou co PNV algo que xa fora rexeitado na reforma laboral".
"O diálogo social non pode ser 'cando me interese chego a un acordo e cando non chego a un acordo doutra banda'. O manter ás veces un Goberno leva a traizoar acordos importantes para este país", censurou.
"É moi fácil decidir por decreto que os empresarios e os autónomos suban os salarios aos traballadores, pero cústalle moito traballo á administración cando actúa de empresa", expuxo.
