O TSXG tomba o terceiro intento de restauración da canteira de Casalonga
O Tribunal considera que a Declaración de Impacto Ambiental xa perdeu vixencia e o Plan de Restauración xa non ten apoio legal para seguir adiante
Por Galicia Confidencial | Santiago | 10/02/2024 | Actualizada ás 10:48
O TSXG conclúe que a DIA perdeu a súa vixencia para a restauración da canteira de Casalonga no Concello de Teo. En consecuencia, “o Plan de Restauración que se aproba na resolución recorrida carece de respaldo de avaliación ambiental, ao non estar vixente a DIA que no seu momento serviu para aprobar a versión inicial que agora se pretendía actualizar”.
Ademais, o TSXG, considera que o cambio no uso final do chan, que pasa dun uso industrial do plan do 98 a un uso forestal no plan que se aprobou no 2021, este cambio é suficiente, por si mesmo, para que se tramitara un procedemento de modificación do plan de restauración e non a súa simple actualización. Isto significa que o procedemento de modificación do plan debería ter incluído como mínimo un trámite de información pública que aquí non se produciu. Esta é outra das causas pola que se anula a resolución de actualización do plan de restauración.
O TSXG establece que se omitiu “completamente o trámite de información pública, consulta que debe ser tida en conta á hora de adoptar a decisión. Esta alteración procedimental determina que debamos anular tamén por esta causa a resolución de actualización do Plan de Restauración, pois realmente precisaría unha modificación”. Esta sentenza tan só é susceptible de recurso de casación ante o Tribunal Supremo.
