Denuncian a presenza de reses mortas nun arroio, preto da captación da traída de augas de Boiro
A Xunta trata de localizar ao autor dos feitos, que xa foi identificado.
Por Europa Press / Redacción | SANTIAGO DE COMPOSTELA | 23/02/2024 | Actualizada ás 19:53
A asociación ecoloxista Arco Iris denunciou este venres a presenza de varias reses mortas, arroxadas nun afluente do río Coroño, augas arriba do punto de captación de auga para consumo da traída de Boiro.
Arco Iris denunciou nun comunicado que un gandeiro arroxou ao arroio polo menos tres vacas mortas e que un dos animais aínda permanece alí, en avanzado estado de descomposición. Así mesmo, asegurou que ese gandeiro ten antecedentes "por malos tratos animais".
Segundo explicou a asociación, as vacas desta explotación atópanse en réxime de semiliberdade, pero todas estaban identificadas. Arco Iris puxo os feitos en coñecemento do Concello de Boiro e do Seprona, aínda que lamentaron que non se tomaron medidas.
Así, lembraron que existen uns protocolos para a retirada e xestión dos restos animais, e advertiron dos "evidentes riscos para a saúde pública" pola presenza destes animais mortos preto do punto de captación de auga que logo é consumida. Por iso, esixiron á Consellería de Medio Rural e á Mesa de Coordinación e Control da Cadea Alimentaria de Galicia a apertura do correspondente expediente informativo, "a imposición das máximas sancións" a que houbese lugar e a inmediata retirada das vacas do curso fluvial afectado.
Finalmente, Arco Iris criticou a "asombrosa pasividade" tanto de Seprona como do Concello, "coñecedores deste espectáculo terceiromundista e que non fixeron nada para liquidalo".
PROPIETARIO IDENTIFICADO
Nunha resposta facilitada a Europa Press, a Xunta sinalou que ten constancia deste episodio desde este mesmo venres tras recibir unha comunicación oficial da Oficina Rural de Padrón.
Agora, trata de localizar ao propietario da res, que xa foi identificado pero co que aínda non puido contactar, para que asuma a retirada do animal.
Ademais, a Consellería do Medio Rural sinala que está en contacto co Concello de Boiro para "solucionar o problema", tanto na localización do propietario como na xestión da recollida do cadáver a través dunha empresa autorizada.
