Investigado o xerente dunha empresa de transportes do Salnés por roubar seis vigas de ferro

A Garda Civil de Vilagarcía investiga ao xerente dunha empresa de Guindastres e Transportes da comarca do Salnés como presunto autor dun delito de furto de seis vigas de ferro. Segundo sinalan nun comunicado, as vigas teñen uns 12 metros de lonxitude cada unha e están valoradas en máis de 6.000 euros.

O pasado 27 de xaneiro, unha empresa naval da comarca interpón unha denuncia na oficina de atención ao público da Garda Civil en Vilanova de Arousa na que afirma que o día 26 levaron do exterior das súas instalacións seis vigas de ferro, que alcanzan cada unha un peso de 1000 kg.

A partir dese momento iníciase unha investigación para dar co autor ou os autores do feito, e tras diversas pescudas, conclúese que o camión-guindastre utilizado para transportar as vigas pertence á empresa que se investiga. Realízase unha inspección na empresa e obtense a suficiente información para investigar ao propietario, de 59 anos, que tamén realiza traballo de condutor na mesma. As dilixencias, coordinadas polo Xulgado de Instrución Nº2 de Vilagarcía seguen abertas, e non se descarta a investigación de máis persoas que puidesen participar na comisión dos feitos.

Vehículo da Garda Civil. GARDA CIVIL - Arquivo