A axenda do 8M da Delegación do Goberno contará con pancartas conmemorativas, coloquios e cursos de formación
Os actos estenderanse ata o 11 de marzo.
Por Europa Press / Redacción | SANTIAGO DE COMPOSTELA | 02/03/2024 | Actualizada ás 12:51
A Delegación do Goberno en Galicia ten previstos unha serie de actos para a semana do 8 de marzo, Día da Muller, que comezaron este venres e terminarán o luns 11 de marzo. Entre eles, destacan os cursos sobre o marco xurídico para mulleres estranxeiras vítimas de violencia de xénero destinados aos servizos sociais provinciais e un coloquio de mulleres que avaliará as diversas realidades das galegas.
Segundo informou a Delegación, a semana do 8M comezará coa instalación dunha pancarta conmemorativa en todas as Subdelegacións que permanecerá exposta ata o luns 11 de marzo. Ademais, detallou que os cursos sobre o marco xurídico aplicable ás mulleres estranxeiras vítimas de violencia de xénero estarán dirixidos polos xefes das oficinas de estranxeiría.
O primeiro levarase a cabo o 4 de marzo ás 10,00 horas na Coruña, no salón de actos da Delegación, ao día seguinte terá lugar o de Lugo, ás 11,00 no salón de actos da Axencia Tributaria, e o de Ourense, no salón de actos da Subdelegación ás 11,00. Por último, a cita en Pontevedra está prevista para o 7 de marzo ás 10,00 na Subdelegación.
En paralelo a estes cursos, o xoves 7 ás 12,00 horas organizarase un coloquio na sede coruñesa do Museo Nacional de Ciencia e Tecnoloxía con mulleres novas que exporán as súas ideas e puntos de vista para lograr unha visión xeral da súa situación en Galicia e que formen parte do debate público.
Os actos ao redor do 8M comezaron este venres coa presentación por parte do delegado do Goberno, Pedro Blanco, do primeiro Punto Violeta do Servizo Público de Emprego Estatal, situado nas oficinas da Dirección Provincial da Coruña, que se estenderán ao resto das oficinas da entidade.
Doutra banda, a Delegación busca estender a súa axenda feminista todo o ano con iniciativas como os recoñecementos 'Meninas' e outras actividades locais que pon acento nas políticas feministas e na loita contra a violencia de xénero, como a mostra 'Amigo, dáte conta'.
