'Escenas do Cambio' celebrarase entre o 3 e o 5 de maio con seis espectáculos que se estrearán a nivel mundial

A Xunta presentou este venres o programa da décima edición do festival 'Escenas do cambio', que se celebrará entre o 3 e o 5 de maio na Cidade da Cultura con máis dunha decena de propostas de danza, teatro e arte en acción, e seis delas estrearanse a nivel mundial.
Dirixido pola bailarina e coreógrafa Kirenia Martínez, este aniversario concíbese "como unha celebración da traxectoria do festival e da súa capacidade transformadora", tal e como destacou a Xunta nunha nota de prensa.

O director xeral de Cultura, Anxo M. Lorenzo, subliñou na presentación o carácter "rompedor e diverso" do festival, no que o público poderá gozar de 13 propostas que "desafían, nos seus procesos e resultados, os límites da creación artística".

Así, haberá oito obras que interveñen diferentes lugares dentro e fóra do Gaiás para convertelos en "moito máis que un escenario". O Xardín do Teatro e o conxunto escultórico 'Espellos', de Manolo Paz no Bosque de Galicia, serán o lugar para o reencontro entre o bailarín español Andrés Corchero e o xaponés afincado en Estados Unidos Oguri, que renovan baixo o ceo galego o seu proxecto de creación continua 'My neighbor sky'.

Tamén no exterior do Bosque de Galicia e polas rúas de Compostela circulará o 'Rabaño sinfónico' guiado pola artista cíborg Moon Ribas e o acróbata Quim Girón. Neste caso, trátase dunha obra "creada en comuñón na que o público participa cun altofalante a modo de choque electrónico que dará orixe a un novo universo sonoro a partir do movemento e da voz".

Dentro do Museo, o piso -1 converterase nun Calidoscopio visual e sonoro de 360 graos no cal os músicos de Gallaecia Ensemble Barroco compartirán co público a primeira interpretación sobre instrumentos históricos da partitura 'In C', de Terry Riley, pioneiro da composición minimalista. Este espazo será, ademais, o lugar da estrea absoluta de 'Dual', a creación de danza e son en vivo coa que o estremeño Álvaro Murillo e o artista sonoro madrileño Artomático exploran as posibilidades do movemento creativo para previr o envellecemento motor e cerebral.

Ademais, a galería subterránea que conecta os diferentes edificios da Cidade da Cultura será o búnker desde o que a premiada compañía vasca La intrusa dará forma a 'Prusik', unha rede de mulleres disposta a asaltar o Edén para construír unha nova humanidade. Unha obra que contará coa participación das bailarinas galegas Clara Ferrao, Marcia Vázquez, Ana Beatriz Pérez e Raquel Ferradás.

De liberdade, represión e beleza falará tamén desde os túneles do Gaiás o galego David Loira, que estrea a peza 'Blondi', na que conecta a súa experiencia persoal como guía turístico en Berlín e nos campos de concentración nazis con episodios históricos de discriminación e odio ao diferente.

INSTALACIÓNS PERFORMATIVAS No Hall de tirantes do Museo e na Sala Eisenman, o espazo será intervido por dúas instalacións performativas. Na primeira, o portugués António Gonçalves estrea 'Corpo que se fai imaxe', unha montaxe inmersiva que reinterpreta a súa primeira performance, sobre a que indaga o ensaio 'Língua Bífida' do profesor da Universidade do Porto Pedro Eiras, que ambos presentarán xuntos no festival. A Sala Eisenman converterase en 'SEDE', unha paisaxe de palabras co que a canaria Raquel Ponce estira ata o imposible os límites da linguaxe.

Completan o programa desta edición, 'Millo Lanuxe', primeira obra da compañía galega Ai, Cariño!, creada por Cris Vilariño e Diego M. Buceta en coprodución co Centro Coreográfico Galego; 'Let Sleeping Dogs Lee', da intérprete e mestra internacional Laura Aris, e Phn: 'International Night Galicia', colaboración co Centro Dramático Galego que permitirá escoitar, desde o balcón do Salón Teatro, unha mostra da dramaturxia contemporánea en tres linguas minorizadas europeas: o ladino do Tirol do Sur, o yiddish falado en Romanía e o irlandés.

Toda a información da programación de 'Escenas do cambio' está dispoñible na web da cidade da cultura e tamén na do festival. As entradas e abonos para o festival poden adquirirse xa no Museo Centro Gaiás e en Ataquilla.com.

Museo Centro Gaiás da Cidade da Cultura. CIDADE DA CULTURA