As bolsas para o curso 2024-2025 pódense solicitar desde este martes, sabes os requisitos?
A principal novidade desta convocatoria é a subida do 5 % nos limiares de renda, que permitirá que máis estudantes accedan a unha bolsa. Isto súmase ás melloras incorporadas en cursos anteriores como o incremento de 1.600 a 2.500 euros nas bolsas de residencia.
Por Europa Press / Redacción | MADRID | 18/03/2024 | Actualizada ás 13:10
A convocatoria xeral de bolsas e axudas ao estudo para o curso 2024-2025 abrirase este martes, 19 de marzo, e poderanse solicitar ata o 10 de maio a través da sede electrónica do Ministerio de Educación, Formación Profesional e Deportes. Desde que se abra a convocatoria, os alumnos que vaian cursar Bacharelato, Formación Profesional, Ensinos Artísticos, Deportivos, de idiomas ou estudos universitarios, entre outros, poderán pedir a súa bolsa.
Como na convocatoria anterior, deberán cumprimentar unha serie de datos provisionais, que poderán modificar máis adiante, e deberán facelo aínda que non saiban aínda as notas que obterán este curso, que van estudar no que vén ou se van continuar ou non coa súa formación. A principal novidade desta convocatoria é a subida do 5 % nos limiares de renda, que permitirá que máis estudantes accedan a unha bolsa. Isto súmase ás melloras incorporadas en cursos anteriores como o incremento de 1.600 a 2.500 euros nas bolsas de residencia.
Nas próximas semanas anunciaranse tamén as datas da convocatoria de axudas para estudantes con necesidade específica de apoio educativo. A principal novidade, neste caso, é a redución da porcentaxe de discapacidade que é necesario acreditar para solicitar estas axudas, que pasa do 33 % ao 25 %. A convocatoria de bolsas deste ano conta cun orzamento de 2.535 millóns de euros, similar ao do curso anterior debido á prórroga dos Orzamentos Xerais do Estado, e beneficiará a preto dun millón de alumnos que poderán obter unha bolsa que lles permita continuar cos seus estudos.
