Denuncian que os novos "colapsos" nas Urxencias do CHUS non teñen "causa estacional que os xustifique"
A Xerencia activa recursos "extraordinarios" no Hospital Gil Casares para atender unha demanda "superior á media diaria anual".
Por Europa Press / Redacción | SANTIAGO DE COMPOSTELA | 19/03/2024 | Actualizada ás 20:57
A Asociación de Pacientes e Usuarios do CHUS (Complexo Hospitalario Universitario de Santiago) denunciou novos "colapsos" no servizo de Urxencias do Clínico compostelán os últimos días, xa en marzo, "sen ningunha causa estacional que o xustifique". Segundo publica este colectivo en redes sociais, xunto cun vídeo dos corredores de Urxencias, os días 14 e 15 de marzo --pasados xoves e venres-- houbo "decenas de pacientes" que acudiron e que estaban "aparcados nos corredores con colas que saían pola porta".
Ademais, esta situación "volveuse a repetir" o luns, 18 de marzo. De acordo co relato da asociación, ás 15.00 horas da tarde había "53 pacientes con ingreso asinado" que "esperaban por unha cama en planta" nas zonas de traballo. Ademais, outros 23 "graves" estaban no pasillo central e nos lindeiros, en padiolas e cadeiras de rodas.
Neste contexto, a Asociación de Pacientes e Usuarios do CHUS nega os "relatos oficiais que afirman" que a saturación das Urxencias do Clínico sexa algo "de orixe estacional", porque a causa "radica na ineficiente xestión" das camas hospitalarias.
Segundo os propios datos da área Sanitaria de Santiago-Barbanza, actualizados ás 8.00 da mañá deste martes, nas últimas 24 horas foron atendidos en Urxencias 551 persoas, das cales 65 tiveron que ingresar.
CIFRAS SIMILARES AO INVERNO
Cabe destacar que a cifra de asistidos --sen especificar o motivo-- en Urxencias na última xornada é similar á dalgún día dos pasados decembro e xaneiro, cando houbo unha forte onda de infeccións respiratorias. Fontes da Xerencia da área Sanitaria consultadas por Europa Press recoñecen que o número de emerxencias atendidas estes días no Clínico "está a ser superior á media diaria anual" e débese a "múltiples" patoloxías, aínda que moitas delas seguen sendo de carácter respiratorio e os pacientes, dunha idade media avanzada.
De feito, esta situación provocou que o CHUS tivese que activar recursos "extraordinarios", por exemplo o emprego de camas de ingreso do Hospital Gil Casares.
En calquera caso, a Xerencia asegura que os doentes que son clasificados con 'prioridade 1', dentro do sistema de triaxe Manchester, "son atendidos de maneira inmediata". Así mesmo, as mesmas fontes reivindican que "nos últimos anos" o Clínico realizou "un importante esforzo" en ampliar tanto os espazos como a dotación tecnolóxica das súas Urxencias, que ademais incrementaron o seu persoal "nun 30 por cento".
