Un total de 38 alumnos galegos participan no certame 'Spainskills' para demostrar "todo o potencial" da FP galega

O conselleiro de Cultura, Educación, FP e Universidades, Román Rodríguez, recibiu este mércores ao equipo de estudantes que vai representar a Galicia no certame 'Spainskills 2024', e animounos a demostrar "todo o potencial" da FP galega. O equipo que participará nestas olimpíadas nacionais de formación profesional está formado por un cento de persoas, entre alumnos e docentes. O certame terá lugar do 9 ao 13 de abril no IFEMA de Madrid.

En total haberá 38 alumnos de 23 centros de Galicia e compítese por parellas en catro modalidades: Xardinaría Paisaxística, Sistemas Robóticos Integrados, Mecatrónica e Robótica Colaborativa. Galicia participa en 34 modalidades de 'skills', das que 29 son competicións oficiais e clasificables para os campionatos internacionais.

Nas modalidades oficiais participan estudantes de centros da Coruña, Cee, Ortigueira, Vigo, Pontevedra, Lugo, Santiago de Compostela, Ferrol, Melide, Lugo, Ponteareas, Culleredo, Ponteceso, Vila de Cruces, e Betanzos. Tamén hai representación galega en demostracións de Cloud Computing, Enerxías Renovables, Farmacia e Parafarmacia, Robótica Colaborativa e Tecnoloxía de Vehículos Pesados. Os estudantes que gañen a medalla de ouro en 'Spainskills 2024' formarán parte da delegación española que participará nos próximos campionatos internacionais de FP.

O conselleiro de Cultura, Educación, FP e Universidades en funcións, Román Rodríguez, recibe ao equipo galego de FP que representará a Galicia na competición SpainSkills 2024. A 3 de abril de 2024 | Fonte: XOÁN CRESPO