O BNG pide no Senado "solidariedade" cos traballadores da CRTVG

A senadora do BNG, Carme da Silva, solicitou que o Senado "se solidarice" cos traballadores da CRTVG por "levar case seis anos sufrindo ameazas, presións, censura, control, acoso laboral e persecución" polo "único feito de querer facer ben o seu traballo".

Nun comunicado, a formación nacionalista lamentou que o PSOE rexeitase a proposta do BNG mentres que a senadora Carme da Silva condenou as "ameazas do xefe de gabinete da presidenta da Comunidade de Madrid a xornalistas". Para o BNG, continuou a senadora, falar de liberdade de prensa e o dereito ao libre exercicio xornalístico "transcende o que sucede na Comunidade de Madrid".

"Supón falar de censura e da manipulación, por exemplo, que sofren desde hai anos os centos de traballadores da CRTVG. Os medios públicos galegos", sinalou a senadora do BNG durante a moción en defensa da liberdade de prensa.

Carme da Silva, co obxectivo de "romper o círculo madrileño" e visualizar e denunciar outras realidades "igual de lamentables" e "mesmo máis asfixiantes e graves" porque afectan a "centos de xornalistas da CRTVG", lamentou que o PSOE "non aceptase" a proposta de emenda do BNG.

Nela, propuñan que o Senado "mostrase a súa solidariedade" cos traballadores da CRTVG que "levan máis de cinco anos e nove meses" mobilizándose cada venres para "denunciar a manipulación, a propaganda, a censura, a falta de imparcialidade e o control que exerce a dirección ao servizo do goberno do PP da Xunta".

Os profesionais dos medios públicos galegos, remarcou a senadora do BNG, "unicamente queren" desenvolver a súa profesión xornalística "libremente". "Queren poder cumprir cos criterios establecidos na lei: informar con veracidade, con imparcialidade e neutralidade. Queren ofrecer información de calidade e ao servizo dos galegos e non ao servizo dunha organización política, o PP", subliñou.

A senadora Carme da Silva pregunta na Cámara Alta. BNG