A USC premia a calidade lingüística de 25 traballos académicos en galego
Tras a entrega dos recoñecementos tomou a palabra Verónica Civeira, en representación de todos os premiados, que considerou estes galardóns, ademais dun "recoñecemento ao uso da lingua" propia, un impulso ao seu "compromiso para seguir usándoa". "Temos a fortuna de contar cunha lingua propia que temos que seguir protexendo e coidando", dixo.
Por Europa Press / Redacción | SANTIAGO DE COMPOSTELA | 18/04/2024 | Actualizada ás 14:30
O Paraninfo da Universidade de Santiago de Compostela (USC) acolleu este xoves a entrega dos premios a calidade lingüística dun total de 25 traballos realizados no curso 2022-2023 en galego, un galardón que cumpre 20 anos en busca de fomentar unha cultura de calidade no uso do galego entre o alumnado.
Os premios á calidade lingüística dos traballos académicos, Traballos de Fin de Grao (TFG) e Traballos de Fin de Mestrado da USC do curso 2022-2023 entregáronse nunha cerimonia que presidiu o reitor, Antonio López, e na que tamén interviñeron o conselleiro de Cultura, Lingua e Xuventude, José López Campos, e o director do Servizo de Normalización Lingüística da USC, Manuel Núñez Singala.
Durante o acto, o reitor lembrou que no Paraninfo da Universidade foi, precisamente, onde se pronunciou en 1915 a primeira lección en galego da que hai constancia nesta institución, e alí trasladou tamén en 1933 Francisco Fernández del Riego un discurso reclamando "unha universidade máis galega". Hoxe en día, dixo Antonio López aos presentes, a USC é unha universidade que "traballa pola lingua" propia e "por facer ciencia e coñecemento tendo como referente a Galicia".
Pars o reitor, estes premios son, de feito, a mellor mostra "do compromiso e a aposta da USC por favorecer e incentivar o mellor uso da lingua en todos os ámbitos, particularmente naqueles como a docencia ou a investigación nos que, aínda que con importantes avances, hai que seguir esforzándose".
En relación a esta cuestión, o reitor compostelán anunciou que no próximo Claustro, do mes de maio, levará como proposta un plan de acción en materia de normalización lingüística que abarcará o período 2024-2026. Por outra banda, durante a súa intervención, o conselleiro José López instou a "aspirar a fomentar unha cultura de calidade" en galego e, especialmente, a usalo na investigación, particularmente na de ámbito científico.
Tras a entrega dos recoñecementos tomou a palabra Verónica Civeira, en representación de todos os premiados, que considerou estes galardóns, ademais dun "recoñecemento ao uso da lingua" propia, un impulso ao seu "compromiso para seguir usándoa". "Temos a fortuna de contar cunha lingua propia que temos que seguir protexendo e coidando", dixo.
