O Corpus Christi de Ponteareas, Ben de Interese Cultural
A Xunta asina un convenio de colaboración con Vigo para revitalizar Bouzas por valor de dous millóns de euros.
Por Europa Press / Redacción | SANTIAGO DE COMPOSTELA | 23/04/2024 | Actualizada ás 09:45
O Consello da Xunta deu luz verde ao decreto que declara a festa do Corpus Christi de Ponteareas como Ben de Interese Cultural (BIC) de patrimonio inmaterial. Así o confirmou o presidente do Goberno galego, Alfonso Rueda, na rolda de prensa posterior á celebración da reunión semanal do Goberno autonómico, celebrada este luns.
O recoñecemento chega tras os informes favorables do Museo do Pobo Galego, a Universidade de Santiago de Compostela e o Consello da Cultura Galega, "culminando así un proceso no que non se rexistraron alegacións". O decreto valora non só a festividade en si, senón tamén os rituais, cerimonias e técnicas artesanais tradicionais asociadas a ela.
Así, a documentación conclúe que o Corpus Christi "constitúe un ritual festivo recoñecido polo seu uso social e cerimonial cunha alta pegada de coñecementos populares sobre a natureza, os elementos naturais e os ciclos do campo". Valórase, así mesmo, a confección dun conxunto artístico dotado de variadas representacións e símbolos, "cunha significación cultural vai máis aló do ámbito relixioso para vincularse coa cultura popular". Influíu tamén, segundo apuntan, o "elevado" coñecemento e desenvolvemento de técnicas artesanais tradicionais.
A declaración favorable recolle de igual maneira o impacto da festa a nivel económico e todo o conxunto de actos que se desenvolven ao redor dela. Subliñan a súa capacidade integradora e potencial como activo económico de base cultural", así como "a gran acollida aos visitantes".
CONVENIO PARA REVITALIZAR BOUZAS, EN VIGO
Por outra banda, tamén se autorizou a rúbrica dun novo convenio de colaboración co Concello de Vigo para a posta en marcha do Plan de Sostenibilidade Turística do Centro histórico da vila de Bouzas por valor de dous millóns de euros, que se desenvolverá ata o ano 2026.
Tal e como desenvolveu Rueda, enmárcase no Plan territorial de centros históricos e vilas termais, deseñado polo Goberno autonómico con fondos europeos Next Generation e que se suma ao autorizado a semana pasada para a cidade de Vigo por outros dous millóns de euros, neste caso, incluído noutro dos plans territoriais da Xunta, o Enogastronómico.
Respecto ao de Bouzas, inclúese a posta en marcha dun plan de xestión de residuos, un plan de renaturalización do litoral do centro histórico ou a mellora do sistema de iluminación con sistemas de baixo consumo e autosuficientes. Tamén se prevé o proxecto de humanización da rúa do Pazo-casco antigo de Bouzas, unha estratexia de promoción dixital do casco antigo e festas culturais.
