Román Rodríguez comprométese a reforzar o apoio da Xunta á mellora das competencias lingüísticas do alumnado
A Xunta oferta este curso preto de 2.500 prazas de estancias tanto en Galicia como no estranxeiro durante a época de verán.
Por E.P. | SANTIAGO DE COMPOSTELA | 27/04/2024 | Actualizada ás 18:06
O conselleiro de Educación, Ciencia, Universidades e Formación Profesional, Román Rodríguez, comprometeuse a reforzar o apoio da Xunta á mellora das competencias lingüísticas nunha lingua estranxeira do alumnado galego e avanzar na consolidación do "modelo de éxito" do sistema educativo galego.
Así o expresou este sábado en Mondariz-Balneario, onde visitou ao alumnado participante nas estancias lingüísticas de primavera 'Spring Week', que este ano alcanzan os 1.450 alumnos de entre 6º de Primaria e 4º de ESO.O titular de Educación animou aos mozos a "aproveitar ao máximo" a oportunidade na que, durante unha semana, practican falar inglés con apoio de profesorado nativo mediante diferentes actividades, á vez que "se fomenta a convivencia" entre o grupo.
Román Rodríguez lembrou que o seu departamento oferta este curso preto de 2.500 prazas de estancias tanto en Galicia, como no estranxeiro durante a época de verán. Neste último caso o programa, dirixido a alumnado de Bacharelato, desenvólvese en agosto e consiste nunha estancia de tres semanas en réxime residencial ou familiar en diferentes países como Reino Unido, Irlanda, Canadá, Francia, Alemaña e Portugal.
