Alerta ante unha posible proliferación do mildiu e o 'black rot' nas vides se suben as temperaturas

A Deputación de Pontevedra aconsellou extremar a vixilancia dos viñedos ante o mildiu e o 'black rot' debido á previsión do aumento das temperaturas. Así o fixo a través do boletín fitosanitario de Areeiro e recomendou tratar ante o mildiu as patacas e plantas de horta, xa que despois das choivas e coa subida das temperaturas producirase unha evaporación de auga do chan que favorecerá á aparición deste patóxeno nas plantas próximas ao terreo.

Segundo informou a Deputación, nestes días, Areeiro ten detectado diferentes situacións con respecto ao avance do mildiu. Por iso, advertiu da necesidade de extremar a vixilancia e, naqueles predios nos que haxa maior incidencia de síntomas, renovar o tratamento canto antes. A humidade elevada e as temperaturas altas favorecen a aparición de 'black rot' nas vides polo que Areeiro aconsella "estar moi pendentes" e, naqueles predios con historial de danos por este patóxeno, utilizar funxicidas rexistrados para controlalo.