O turismo galego crece un 12% nos tres primeiros meses do ano, influenciado polo Entroido e a Semana Santa
Alcanzou máis de 822.000 viaxeiros aloxados.
Por Europa Press / Redacción | SANTIAGO DE COMPOSTELA | 03/05/2024 | Actualizada ás 16:51
A Xunta destacou este venres que o turismo galego "continúa consolidando a súa desestacionalización", como demostran os resultados feitos públicos polo Instituto Nacional de Estatística (INE) que indican que, no primeiro trimestre do ano, Galicia alcanzou máis de 822.000 viaxeiros aloxados e preto de 1,5 millóns de pernoctacións no conxunto do aloxamento turístico.
Isto supón que o nivel de demanda rexistrado -medido polo número de pernoctaciones- supera nun 12% a cifra do primeiro trimestre de 2023, e mellora as cifras prepandemia, indica o Goberno galego. Ademais, por vez primeira Galicia supera a barreira de 1,4 millóns de noites neste primeiro trimestre.
"O bo comportamento da demanda neste tres primeiros meses vén como consecuencia dos incrementos rexistrados en febreiro, co Entroido, e, sobre todo, en marzo, mes no que se celebrou a Semana Santa e que supuxo un importante nivel de afluencia turística a Galicia", apunta a Xunta. Neste primeiro trimestre, o 84% da demanda corresponde ao segmento hoteleiro, mentres que o 16% restante queda no aloxamento extrahotelero.
