Máis de 30.000 maiores de 50 concellos rurais galegos xa poden facer a Renda asistidos telefonicamente

Máis de 30.000 maiores residentes en 50 concellos rurais de Galicia poden desde este martes facer a declaración da Renda sendo asistidos de forma telemática a través dunha videochamada por persoal da Axencia Tributaria. Na xornada inaugural deste programa lanzado este ano a nivel estatal, o delegado do Goberno en Galicia, Pedro Blanco, desprazouse a Antas de Ulla, un dos municipios que se adheriron a esta iniciativa que pretende facilitar o acceso aos maiores aos trámites telemáticos e reducir a "fenda dixital".

Alí, acompañado pola alcaldesa, Pilar García Porto; o representante do Executivo estatal animou aos maiores de 65 anos que residen nos 50 concellos sumados á iniciativa a participar neste programa, que estará operativo ata o 28 de xuño. Os interesados poden pedir cita na propia casa consistorial do seu municipio ou na web da Axencia Tributaria. Tamén poden solicitar asesoramento por vía telefónica, que lles proporcionarán axuda en horario de luns a venres entre as 09.00 e as 19.00 horas.

Así, prestarase este servizo en 19 municipios lugueses (Abadín, Antas de Ulla, Baleira, Baralla, Begonte, Carballedo, Xermade, O Incio, Láncara, Navia de Suarna, As Nogais, Pantón, Pol, A Pobra do Brollón, Riotorto, Samos Sober, Trabada e O Vicedo). En Ourense, serán un total de 18 (A Arnoia, Avión, Carballeda de Avia, Castrelo de Miño, Entrimo, Laza, Lobios, Melón, Muíños, A Pobra de Trives, San Xoán de Río, Riós, Sandiás, Sarreaus, Taboadela, Vilamarín, Vilar de Barrio e Xunqueira de Ambía). Na provincia da Coruña foron elixidos 8 concellos (A Baña, A Capela, Frades, Irixoa, Lousame, Monfero, Santiso e Toques) e na de Pontevedra, 5 (Arbo, Campo Lameiro, Covelo, Pazos de Borbén e Pontecesures).

CINEMA PARA MAIORES

Tamén este martes, Pedro Blanco convidou aos 700.000 galegos de máis de 65 anos a aproveitar a nova edición do programa 'Cinema Sénior' do Ministerio de Cultura, que pon á súa disposición entradas para asistir a películas os martes a prezos de ata 2 euros. Segundo as cifras achegadas polo delegado do Goberno, o pasado ano chegou a 16.861 persoas que acudiron entre xullo e decembro ás 167 salas que se sumaron a unha iniciativa que en 2024 alcanzará tamén ata final de ano cun orzamento de 12 millóns de euros, dous máis que en 2023.

O delegado do Goberno en Galicia, Pedro Blanco, xunto a unha persoa maior que participa no programa que ofrece asistencia telemática a persoas que residen no rural para facer a Renda | Fonte: DELEGACIÓN DO GOBERNO EN GALICIA