Sanidade avanza cambios no modelo de urxencias do Sergas tras "picos ocasionais" debidos a "múltiples causas"

O conselleiro de Sanidade, Antonio Gómez Caamaño, avanzou que poderá haber cambios en "o modelo" das urxencias do Servizo Galego de Saúde (Sergas), despois de episodios de "picos ocasionais" de pacientes como o ocorrido esta semana, en pleno maio, no Complexo Hospitalario Universitario de Santiago (CHUS) e que se debe a "múltiples causas".

En declaracións aos medios ofrecidas este mércores, nun acto na sede da súa Consellería en San Lázaro, Gómez Caamño recoñeceu que este "problema" --denunciado pola Asociación de Pacientes e Usuarios do CHUS, no caso do Hospital Clínico compostelán-- ocorre en "todos os hospitais".

"Probablemente teñamos que expornos ó modelo de urxencias que temos para poder tamén programar todo este tipo de problemas", engadiu a continuación. A pesar de valorar o "gran esforzo de investimento" que realizan estes servizos, adiantou que "probablemente terán que facer máis".

En calquera caso, o novo conselleiro asegurou que "estas ondas de pacientes son moi difíciles de evitar, porque son imprevisibles". Así, avogou por "estudar por que pasan e, en función diso, tomar medidas". Ademais, Antonio Gómez Caamaño aposta pola "educación sanitaria" para que a administración ensine "cando un paciente ten que ir a urxencias e cando non". "Hai cousas que non deberían chegar alí (a urxencias), pero claro, ao final isto é un sistema, o paciente ten un problema e quere que llo solucionen canto antes", agregou.

INFORME DE CONTAS

Noutra orde de cousas, o conselleiro foi preguntado sobre o informe do Consello de Contas publicado o luns, referido ao ano 2022, que reclamaba un financiamento "realista" do Sergas tras detectar diferenzas entre os orzamentos planeados e o que finalmente se acababa gastando.

Respecto diso, Gómez Caamaño reiterou o avanzado polo seu propio departamento: a Intervención Xeral da Xunta "está traballado nun novo modelo" de planificación orzamentaria e "por suposto o Sergas vaise a adaptar a el" cunha "planificación racional dos recursos". Sobre se hai unha derivación excesiva de pacientes á privada, o titular de Sanidade alegou que se debe a necesidades por carga asistencial pero que, en todo caso, "seguen procedementos legais", aínda que "probablemente haberá que pensar en novos modelos de programación máis organizada e máis adaptada á realidade".

"As derivacións sempre van ser necesarias. O que hai que facer é, nunha contorna de contexto económico, se cadra non moi expansivo, optimizar ao máximo os recursos que teñas. O que temos que facer non é traballar máis, é traballar mellor", sentenciou Gómez Caamaño.

O CONSELLEIRO ESTÁ PECHANDO RENOVACIÓN DOS CARGOS

O conselleiro de Sanidade, Antonio Gómez Caamaño, confirmou que se atopa "pechando" a renovación dos cargos no Servizo Galego de Saúde (Sergas), iniciada desde que a mediados de abril relevou no cargo a Julio García Comesaña, e que "esta semana" estará completada.

Preguntado sobre se estes cambios afectarán tamén aos xerentes das áreas sanitarias --a semana pasada, el mesmo recoñeceu que "probablemente" sería así--, limitouse a responder que "esta semana quedará máis pechado" o novo mapa de cargos. "Xa se que hai moita ansiedade respecto diso, pero a min gústame facer as cousas de maneira reflexiva, pensando ben nas consecuencias", insistiu Gómez Caamaño. O pasado xoves, era o propio conselleiro o que deslizaba máis cambios nalgunhas xerencias para poder implantar así as "ideas diferentes" que ten para o sistema sanitario.

Aínda que non se referiu a ninguén en concreto --nun contexto no que se especula coa substitución de Eloína Núñez, curmá do líder do PP e expresidente da Xunta, Alberto Núñez Feijóo, como xerente da área de Santiago-Barbanza--, si deixou caer que "probablemente" cambiaría algún destes postos. E é que, desde a súa chegada á Consellería, iniciouse unha renovación en profundidade dos principais altos cargos da sanidade galega, como o xerente do Sergas, que pasou a ser José Ramón Parada; o director xeral de Asistencia Sanitaria, Alfredo Silva; a de Recursos Económicos, Amparo Pousada; e a de Recursos Humanos, María del Mar Pousa.