O rexistro da propiedade en formato electrónico comeza a funcionar despois de 163 anos en papel
Inclúe novidades como unha sede única, posibilidade de videoconferencias, cartafol cidadán e uso do idioma galego.
Por Europa Press / Redacción | SANTIAGO | 13/05/2024 | Actualizada ás 13:50
O Rexistro da Propiedade e Mercantil entrou en servizo este luns en formato electrónico a través dunha sede única despois de 163 anos en formato papel, posto en marcha en 1861. En rolda de prensa, a decana de Rexistradores de Galicia, María Núñez, presentou nun acto en Santiago a nova plataforma electrónica, nunha xornada na que se puxo en marcha con "moitos nervios", pero na que os rexistradores entran na "modernidade" e o "mundo dixital".
Esta medida enmárcase na lei do ano pasado (Lei 11/2023, de 8 de maio) de trasposición de directivas da Unión Europea que inclúe a dixitalización de actuacións rexistrais. Respecto diso, María Núñez subliña que con estas medidas de firma dixital e sede electrónica única búscase "facilitar a vida aos cidadáns", de forma que se vai a poder dar a fe pública de forma en liña.
O acto contou coa presenza do director xeral de Xustiza, José Tronchoni, que valorou o paso adiante que supón este avance. "A partir da pandemia démonos conta que non estabamos a facer as cousas ben", polo que se tomou "conciencia" de que había "cambiar a maneira de traballar" e "urxía" unha modernización. Agora, aposta por "mentalizar" ao persoal das oficinas dos rexistros para que sexan "punta de lanza" nestes cambios. Esta medida é independente de que os rexistros físicos seguirán funcionando igual de 9.00 horas a 17.00 horas. En Galicia, hai 57 rexistradores e 62 rexistros, cun total de 550 empregados.
NOVIDADES
Entre as novidades, os cidadáns poderán contar co seu propio cartafol dixital para revisar os seus expedientes, do mesmo xeito que ocorre noutras administracións, e poderá haber unha videoasistencia en tempo real con sistema de citas para favorecer o trato persoal. Ademais, os usuarios poderán activar un sistema de alertas que lle avisará nos seus teléfonos móbiles do momento no que haxa algún cambio nas súas leiras ou dereitos inscritos, o que dá lugar a unha maior "axilidade" no tratamento da información. Así mesmo, Luís Lopez Iglesias, delegado provincial da Coruña, puxo en valor que a nova sede electrónica estará activa en galego, cun "recoñecemento" ao idioma propio de Galicia "como instrumento xurídico".
