O conselleiro de Sanidade apela á colaboración en doazóns para aumentar reservas de A- e 0+, en niveis baixos
Reitera máis de 9.500 persoas doaron sangue por primeira vez en 2023 en Galicia, que superou as 100.000 doazóns.
Por Europa Press / Redacción | SANTIAGO DE COMPOSTELA | 28/05/2024 | Actualizada ás 16:09
O conselleiro de Sanidade, Antonio Gómez Caamaño, visitou este martes as dependencias da Axencia Galega de Sangue, Órganos e Tecidos (ADOS), onde reivindicou o seu labor "vital" e apelou á "solidariedade" dos galegos para cubrir as case 500 achegas de sangue diarias do Servizo Galego de Saúde (Sergas) (co foco nas reservas de A- e 0+, en niveis baixos).
Acompañado pola secretaria xeral técnica da Consellería de Sanidade, Natalia Lobato; e pola directora da Axencia, Marisa López, o conselleiro puxo en valor a xenerosidade e o altruísmo da cidadanía galega, pois o seu compromiso, lembrou, permitiu situar Galicia, no ano 2022, "como a terceira comunidade con máis doazóns, catro puntos por encima da media nacional".
Segundo ratificou o conselleiro, no ano 2023 rexistráronse en Galicia máis de 100.000 doazóns e, delas, máis de 9.500 eran de persoas que daban o paso por primeira vez. "Estamos moi orgullosos dos datos do ano 2023 e animamos aos galegos e galegas a seguir contribuíndo a salvar vidas con este pequeno pero valioso xesto que representa a doazón", apelou.
Neste sentido, tras destacar o traballo "esencial" que realizan case 250 traballadores da Axencia Galega de Doazóns, o titular de Sanidade solicitou a colaboración cidadá para incrementar as reservas dos grupos sanguíneos A negativo (A-) e 0 positivo (0+), ao atoparse en niveis baixos neste momento.
RENOVACIÓN DAS UNIDADES MÓBILES
O Executivo galego reivindicou que segue traballando no obxectivo de ofrecer "o mellor servizo posible á cidadanía comprometida coa doazón de sangue", realizando durante os últimos anos "un importante esforzo" para mellorar os seus medios. Así, desde o ano 2018, o Executivo galego adquiriu cinco novas unidades móbiles para as áreas sanitarias de Santiago, Pontevedra, Vigo, A Coruña e Ourense. Ademais, e segundo explicou o titular de Sanidade, está previsto licitar unha sexta unidade, con destino a área sanitaria de Lugo en xuño.
Con esta nova adquisición, o Goberno galego superará os dous millóns de euros de investimento no que respecta á renovación das unidades de doazón de sangue. O Executivo galego remarcou que a ADOS conta "cos máis altos estándares" de calidade que se poden obter no ámbito sanitario, e posúe "as máximas certificacións existentes a nivel europeo" en materia de doazón.
