O BNG porá en xaque ao Goberno: pediralle que paralice o megaproxecto eólico na Estrada, Campo Lameiro e Cerdedo-Cotobade
Da Silva considera que a iniciativa do grupo empresarial Atitlán Helios constitúe un exemplo da fragmentación de proxectos eólicos que, como lembra, foi cuestionado polos tribunais en varias resolucións xudiciais ao entender que pretenden "saltarse" trámites ambientais.
Por Europa Press / Redacción | PONTEVEDRA | 06/06/2024 | Actualizada ás 14:36
A senadora do BNG Carme da Silva instará ao Goberno a paralizar o "megaproxecto eólico" de dous parques denominados 'Xubrintas' e 'Alamoceiros' que afecta os municipios pontevedreses da Estrada, Campo Lameiro e Cerdedo-Cotobade. Nun comunicado, a formación frontista avanzou este xoves que a súa senadora cuestionará sobre "este proxecto que de verde non ten nada" á vicepresidenta terceira e ministra de Transición Ecolóxica e Reto Demográfico, Teresa Ribera, na próxima sesión de control na Cámara Alta.
Da Silva considera que a iniciativa do grupo empresarial Atitlán Helios constitúe un exemplo da fragmentación de proxectos eólicos que, como lembra, foi cuestionado polos tribunais en varias resolucións xudiciais ao entender que pretenden "saltarse" trámites ambientais. O BNG, que mostrou o seu apoio á marcha convocada este sábado entre Sabucedo e O Peón, advirte da "grave afectación" a varias parroquias coa instalación dun total de 33 aeroxeradores (15 no de 'Xubrintas' e 18 en 'Alamoceiros').
Ademais, a senadora puxo o foco en que se saen adiante todos os proxectos que en tramitación para esta zona do norte da provincia de Pontevedra instalaranse 281 aeroxeradores. Por tanto, reclamará na súa pregunta á vicepresidenta que esixa o trámite de avaliación de impacto ambiental a estes proxectos ante a "magnitude" do seu posible impacto "sobre a vida dos veciños e a flora e fauna da súa contorna".
