'Rosalía en Camiño': un encontro multilingüe que aúna recital, sentimento e interpretación

A Casa de Rosalía de Castro é visitada cada ano por milleiros de persoas que buscan coñecer onde pasou os últimos anos da súa vida a poetisa galega recoñecida no mundo enteiro. Pero, unha vez ao ano, a fundación organiza unha homenaxe á autora de forma diferente, máis emocional e fermosa, co evento 'Rosalía en Camiño': a través da lectura de poemas. A quinta edición desta cita tivo lugar este xoves, cando o auditorio da vivenda da escritora padronesa acolleu a medio cento de asistentes apaixoados pola poesía.

 

 

 

Rosalía de Castro | Fonte: Commons - Arquivo

 

Ver esta publicación en Instagram

 

 

 

 

 

 

 

 

 

 

 

Una publicación compartida por Galicia Confidencial (@galicia_confidencial)

A emblemática vivenda locía fermosa nun solleiro día desta primaveira-verán que nos acompañou esta semana. "Cantarte hei, Galicia, na lengua gallega, consolo dos males, alivio das penas", dicía Rosalía en 'Cantares Gallegos' (1863). E, tal e como mandaba Rosalía, orgullosa da súa lingua, nun encontro multilingüe léronse poemas en idioma galego, portugués, vasco e catalán. A musicalidade de todas estas linguas semellaba, precisamente, un fermoso canto para os ouvidos.

Bernardo Atxaga, Andreia C. Faria, Pol Guasch, Brenda Mondelo, Andrea Nunes e Miguel Rodríguez Monteavaro foron os encargados de recitar nesta edición. Ademais, previamente houbo unha conversa entre Miguel Rodríguez Monteavaro e Andreia C. Faria na que ambos reflexionaron sobre a súa poesía e as súas obras. Os aplausos non cesaron tras cada lectura e, sen dúbida, quedaron ganas de máis. Haberá que agardar á chegada da edición do vindeiro ano, que xa se convertirá na sexta.