Seis acusados de vender droga en patinete e taxi en Ourense durante a pandemia pactan con Fiscalía reducións de pena
O Ministerio Público retira o delito de grupo criminal.
Por Europa Press / Redacción | SANTIAGO DE COMPOSTELA | 10/06/2024 | Actualizada ás 18:52
A Audiencia Provincial de Ourense sentou no banco a seis acusados por tráfico de drogas durante a pandemia, que chegaron a acordo de conformidade con Fiscalía para reducir a petición de penas, que pasan de oito a cinco anos para os principais acusados.
Así, o Ministerio Público retira o delito de pertenza a grupo criminal, polo que reduce de oito a cinco anos de prisión a petición de pena para tres dos procesados, que recoñecen os feitos a cambio desta condena e 80.000 euros de multa. Ademais, outro dos acusados acepta tres anos de cárcere e 1.000 euros de multa, e os dous restantes confórmanse con ano e nove meses de prisión e 1.000 euros de multa. A cinco dos acusados aplicóuselle a atenuante por consumo de drogas, o restante non era consumidor.
Os feitos remóntanse a febreiro do 2020, cando o grupo de estupefacientes da brigada de Ourense estableceu un dispositivo de vixilancia sobre unha vivenda da cidade ao ter coñecemento de que se trataba dun punto de venda de drogas. O piso pertencía a dous dos acusados que hoxe chegaron a un acordo na Audiencia.
Os axentes comprobaron que durante o estado de alarma foron moitos os clientes que saíron do piso con cocaína, marihuana ou haxix, segundo sinalaba o escrito fiscal no que se recolle que pese ao confinamento seguiron dedicándose á venda de sustancias estupefacientes, a través de chamadas telefónicas cos seus clientes, aos que un dos acusados citaba fronte á porta dun supermercado.
Segundo o escrito fiscal os acusados desprazábanse habitualmente en taxi ou patinete, aínda que tamén nun vehículo particular. En xuño do 2020, cunha orde de rexistro, os axentes accederon a varios domicilios onde atoparon a un dos acusados arroxando pola xanela unha bolsa que resultou conter cocaína.
Ademais, atoparon cannabis, cocaína, pastillas de MDMA e diversos aparellos electrónicos como teléfonos móbiles ou dúas balanzas de precisión e tamén un caderno con anotacións. Tamén acharon diñeiro en efectivo que proviña da venda de sustancias.
Segundo Fiscalía, actuaron "en todo momento concertados entre si e de forma estable coa finalidade de distribuír" estas sustancias. Así pois, pedía case cincuenta anos de prisión, 8 anos para cada un dos acusados por un delito de tráfico de drogas que causan grave dano á saúde e de drogas que non causan grave dano á saúde. Tamén acusaba a tres dos homes por un delito de pertenza a grupo criminal.
Pedía a maiores 100.000 euros de multa para cada un dos implicados, sustituibles por seis meses máis de prisión de non ser posible efectuar o pago, e a expulsión do país cando cumprisen a condena para dúas dos acusados, con prohibición de volver entrar no territorio español por tempo de 10 anos.
