A Xunta gasta case 2 millóns na súa sede para emigrantes e retornados
Abriuna este venres ao público.
Por Europa Press / Redacción | SANTIAGO DE COMPOSTELA | 14/06/2024 | Actualizada ás 14:41
A Xunta de Galicia, no marco da semana da administración aberta, mostrou este venres aos cidadáns a nova sede reformada da Secretaría Xeral de Emigración e a Oficina Integral de Asesoramento e Seguimento de Retorno de Mazarelos, en Santiago, tras un investimento de 1,8 millóns.
Tanto o conselleiro de Emprego, Comercio e Emigración, José González, como a conselleira de Vivenda e Planificación de Infraestruturas, María Martínez Allegue, puxeron en valor as novas instalacións durante unha xornada de portas abertas na que os galegos puideron explorar os centros recentemente rehabilitados e coñecer os servizos dispoñibles.
Desde a súa creación en 2020, a Oficina de Asesoramento e Seguimento de Retorno atendeu a preto de 24.000 persoas e tramitou máis de 112.000 consultas. Estas oficinas, situadas na Coruña, Lugo, Ourense, Vigo e Santiago, ofrecen asesoramento xurídico, social, laboral e tributario, adaptándose ás necesidades dos retornados.
Ademais, a oficina móbil, posta en marcha en 2023, permitiu ampliar a rede de apoio aos retornados, chegando a concellos rurais e a vilas galegas, segundo reivindicou a Xunta nun comunicado. "Queremos facerlles aos emigrantes que desexen retornar o mellor posible o seu camiño de volta", indicou José González na súa intervención na xornada de portas abertas.
El tamén se referiu a a inauguración da nova sede de Emigración, que se rehabilitou para poder ofrecer mellores servizos e un ambiente "acolledor". O obxectivo da obra foi solucionar problemas de illamento térmico e deterioracións en fachadas e cubertas, entre outros.
