Volve o frío e a chuvia a Galicia esta fin de semana

Volve a choiva esta fin de semana. Tamén unha baixada de temperaturas. Ao longo do sábado e domingo, a irrupción de masas de aire procedentes do Atlántico deixará valores frescos para a época do ano en Galicia, mentres que na vertente Mediterránea espéranse temperaturas cálidas, creándose un dipolo térmico bastante marcado na Península Ibérica.

Segundo indica Meteored,esta situación acentuarase durante o comezo da semana que vén xa que unha vaguada atlántica de gran amplitude irase aproximando polo oeste arrastrando unha masa de aire máis frío en todos os niveis que empezará a afectar o extremo occidental da Península desde o mesmo luns e alcanzará tamén á vertente mediterránea a partir do mércores.

Esta vaguada será responsable, ademais, dun novo episodio de tormentas que pode ser significativo, especialmente no interior da metade oriental. Ademais do descenso térmico, máis importante na metade occidental, as tormentas poderían ser rechamantes entre o luns e o xoves tanto pola súa distribución como pola súa intensidade.

O primeiro escenario que podería darse é que a vaguada crece rapidamente a Península deixando importantes tormentas no leste e nordés peninsular até o mércores. E, o segundo, que esta vaguada formase unha profunda DANA, que deixaría tormentas de moita intensidade en zonas do interior e norte peninsular até o xoves. A partir do xoves, a vaguada tenderá a retirarse facilitando o ascenso dunha pequena dorsal anticiclónica que favorecerá unha subida das temperaturas.