O plan director do sector forestal estará aprobado a finais de ano

A conselleira de Economía e Industria, María Jesús Lorenzana, prevé que o plan director do sector forestal-madeira que está a elaborar a Xunta de Galicia estea aprobado a finais deste ano. Así o expuxo este venres durante a súa presenza na asemblea xeral da Asociación Provincial de Empresarios de Primeira Transformación da Madeira de Lugo (LugoMadera), onde mostrou o compromiso da Xunta por aumentar a competitividade do sector.

A conselleira avogou pola colaboración e pola innovación para afrontar retos como a globalización dos mercados, a dixitalización dos procesos e a necesidade da sustentabilidade ambiental. Ademais, sinala que a lei de promoción dos beneficios sociais e económicos dos proxectos que utilizan os recursos naturais de Galicia, que se debaterá proximamente no pleno do Parlamento, regulará o mercado voluntario de créditos de carbono.

A cadea de valor forestal-madeira representa preto do 12 por cento do emprego industrial de Galicia, que é a novena potencia forestal europea e lidera o sector a nivel estatal. Segundo os últimos datos, esta industria conseguiu unha facturación conxunta no ano 2022 que foi a máis elevada desde que hai rexistros: preto de 2.700 millóns. Abarca 3.000 empresas distribuídas por toda a xeografía galega.

Asemblea de LugoMadera, coa conselleira de Economía, María Jesús Lorenzana | Fonte: XUNTA