Unha nai que loita polos dereitos educativos do seu fillo

Nieves Villar Pose acudiu este luns á Xunta para entrevistarse co Conselleiro de Cultura, Educación e Ordenación Universitaria, Román Rodríguez González. Era unha cita concertada dende hai máis dun mes a través da Confederación de ANPAS Galegas, pero en vez do titular de Educación, acudiron dous funcionarios.

Iso, a pesar de ser un caso tremendamente mediático, e que ás portas da Xunta había moita xente apoiando a causa. Estaban, por exemplo, xentes do cerco que aínda seguen acampadas ás portas de San Caetano, con pancartas de apoio e a Confederación de ANPAS Galegas.

Nieves Villar é a nai do neno malpicán enfermo de leucemia que necesita unha atención educativa domiciliaria. Este martes contou co respaldo das ANPAS. “Nós pedimos unha reunión co Conselleiro. Pero que nos dean como excusa a complicada axenda do Conselleiro, cando é o propio Conselleiro quen nos chama…” comenta Fernando Lacaci, voceiro desta entidade. “Os nosos representantes políticos son uns maleducados, e deixarnos a nós na porta poderíase entender, pero non recibir á nai dun neno con leucemia é un problema de insensibilidade rotundo“, critica.

Lacaci considera que a Consellería pode non estar sendo consciente da potencia do caso. “Están topando cunha forza especial que é Nieves, que ve que é o problema a modo global. Dicíalles aos técnicos: “Eu aquí non veño polas horas do meu fillo se non polas horas de todos os fillos enfermos ou que poden estalo”.

"Non podemos esquecer que os nenos e nenas inmersos nun proceso de longa enfermidade, apartados da vida cotiá, non só dos centros educativos, nos que a vida medra separada deles, deben ter unha atención especial. Pois ademais do dramatismo actual, hai que prever no seu futuro. Temos que pensar que todos van curar, e por iso temos prepararlles un futuro, para cando rematen unha experiencia xa de por si tráxica", suliña Lacaci.

"O neno non ten por que adxudicarlle o valor de fracasado escolarmente. A administración ten que solucionar a vida futura deses nenos, o seu dereito de educación coma o resto, aínda que estean enfermos. Ademais, son problemáticas que hai que solucionar en canto xurden, porque estamos falando de cousas moi graves”, sinala.

Por outra banda, segue en marcha a recollida de sinaturas online por unha lei galega de educación domiciliaria para nenos enfermos de longa duración, da que Hadrián é a viva imaxe. Van colleitadas máis de 27.000 sinaturas, pero faltan polo menos outras 8.000 para alcanzar as 35.000 inicialmente calculadas como necesarias para poder levar esta iniciativa adiante.

Do medio colaborador Que Pasa na Costa