Todo vendido para o PortAmérica a dúas semanas do seu comezo

A duodécima edición de PortAmérica colgou o cartel de 'todo vendido' tanto para os abonos como para as entradas diarias para o festival, que se celebrará entre o 4 e o 6 de xullo na Azucreira de Portas. Fíxoo, sinalan nun comunicado, dúas semanas antes do inicio do evento e tras esgotar no mes novembro e en tan só dúas horas os Abonos Crentes, que se poñen á venda antes de revelar o cartel.

Xa na pasada edición o festival conseguiu vender todos os seus abonos e entradas. Ademais, as entradas para a zona de acampada están practicamente esgotadas e o estacionamento para autocaravanas e furgonetas xa está completo. O evento contará cunha ampla selección musical para todas as idades e de diversos estilos, destacando a conexión entre Europa e América Latina. Artistas como Aitana, Juanes, Vetusta Morla, Xoel López, LIT KILLAH, Arde Bogotá, Luz Casal, Lila Downs, Las Drogas e Carlos Sadness, entre outros, encherán de música o festival, acompañados pola experiencia gastronómica do multipremiado ShowRocking.

No ShowRocking máis de 30 chefs de renome, incluíndo 19 con Estrelas Michelin e 4 con Estrelas Verdes, como Javi Oleiros, Diego Guerreiro, Begoña Rodrigo, Fabián Delgado, Édgar Núñez, Luís Lera, Edorta Lamo, Maca de Castro ou Dani Carneiro, baixo a dirección de Pepe Solla, ofrecerán unha degustación de máis de 20,000 petiscos a prezos populares creados especificamente para o evento.

Xa se revelou a lista de tapas seleccionadas por cada chef: un total de máis de 60, tanto salgadas como doces, presentaranse durante os tres días do festival, distribuídas en seis quendas diferentes, facendo do ShowRocking a maior cociña efémera do mundo. A selección de pastelaría, a cargo dalgúns dos mellores profesionais reposteiros, asegurará un toque doce no evento. Ademais, haberá actuacións sorpresa no seu escenario.

Festival Portamérica | Fonte: Portamérica - Arquivo