O verán, que comeza este xoves, será "máis cálido" e "máis seco" do normal en Galicia
A Aemet prognostica un San Xoán sen precipitacións con temperaturas mínimas "agradables".
Por Europa Press / Redacción | SANTIAGO DE COMPOSTELA | 20/06/2024 | Actualizada ás 13:25
O verán será "máis cálido" e "máis seco" do normal en toda Galicia, segundo o avance realizado, en rolda de prensa, polo delegado da Axencia Estatal de Meteoroloxía (Aemet) na comunidade autónoma, Francisco Infante. De cara aos próximos días, indicou que haberá unha "influencia anticiclónica" con "claros" aínda que se manterá a "nebulosidade". "O domingo cambia a situación", avanzou respecto da noite de San Xoán para apuntar que "as nubes desaparecerán en case toda Galicia, menos na Mariña". "Haberá ceos despexados, vento de nordés molesto pero nada de nebulosidade nin precipitacións", dixo.
En canto ás temperaturas, indicou que "se irán recuperando" con valores mínimos "bastante agradables, de 15 graos". A semana que vén, engadiu, será "lixeiramente máis cálida e algo máis seca do normal". "Parece que o tempo estival vaise asentando", recalcou tras lembrar que o verán comeza este xoves, día 20, ás 22.51 horas. O prognóstico da Aemet para os meses de xullo, agosto e setembro é unha "probabilidade moi alta" de que sexa un verán "máis cálido" e "máis seco" do normal en toda España. A previsión é, segundo sinalou Infante, que se sitúe "entre o 20 % dos veráns máis cálidos". "Nada de choiva, calorciño, sol", incidiu.
PRIMAVERA "CÁLIDA E MOI HÚMIDA"
Respecto da primavera, esta foi "cálida e moi húmida" en Galicia. "Sobre todo debido ás temperaturas mínimas que foron máis altas do normal", explicou, e cun "46 % máis de precipitacións". A temperatura máxima do trimestre alcanzouse no mes de abril en Ourense con 33,9 graos. En canto ao balance hídrico, destacou que en España existe un "superávit de precipitacións clarísimo" en toda a vertente atlántica e un "déficit bastante claro" na zona mediterránea. O portavoz de Aemet aludiu tamén á tempada de furacáns no Atlántico, que se prolonga do 31 de xuño ata o 30 novembro, e augurou "entre oito e 13 furacáns, dos cales entre catro e sete serán grandes".
