Non hai crise na construción?... a compravenda de vivendas en Galicia dispárase un 26,7% en abril
Por Europa Press / Redacción | SANTIAGO DE COMPOSTELA | 21/06/2024 | Actualizada ás 10:48
A compravenda de vivendas en Galicia rexistrou o pasado abril un aumento do 26,7%, en comparación co mesmo mes de 2023, ata 1.802 operacións, segundo datos publicados este venres polo Instituto Nacional de Estatística (INE), recollidos por Europa Press.
Desta maneira, a Comunidade contabilizou un aumento superior ao da media nacional, xa que no total de España este incremento foi do 24%, ata 53.091 vivendas. En Galicia, do total de operacións de compravenda, 412 realizáronse sobre vivenda nova (+64%), así como 1.390 sobre vivenda usada (+18,7%). Ademais, a gran maioría (1.758, +27%) era vivenda libre e só 44, vivenda usada (15,8%).
En total, en Galicia transmitíronse 9.869 leiras de calquera natureza, un 16% máis que en abril do ano pasado. Delas, 3.279 eran leiras rústicas, un 17,4% máis, mentres que 6.590 eran leiras urbanas, un 15,4% máis. Destas urbanas, 3.641 eran vivendas, cun crecemento do 20,7% en comparación cun ano antes.
