BNG critica que o Goberno a petición de adiamento a Bruxelas para xustificar a prórroga da AP-9
Por E.P. | SANTIAGO DE COMPOSTELA | 22/06/2024 | Actualizada ás 19:06
O BNG pide ao Ministerio de Transportes "información transparente" en relación coas razóns que motivaron ao Goberno central a solicitar un adiamento para xustificar ante Bruxelas a prórroga da AP-9, así como coñecer cales serán as alegacións que presente.
Tal e como trasladaron nunha nota de prensa, os nacionalistas consideran esta decisión do Goberno "errónea", xa que cren que debería "aproveitar a ocasión e cambiar a posición" que mantén sobre esta cuestión. "Debe aproveitar a oportunidade brindada pola apertura do expediente de infracción para declarar a nulidade da prórroga por non axustarse a dereito", manifestou o deputado no Congreso Néstor Rego.
Neste sentido, lembrou que no ámbito da Unión Europea "xa existen precedentes de casos parecidos que foron resoltos anulando a concesión". Así mesmo, Rego reclamou coñecer o contido íntegro da carta enviada polo comisario de Comercio Interior ao Goberno. Nesta misiva, sinalou, o comisario advertía que o Goberno de Aznar "xa planeaba en 1999 a privatización da AP-9 e que a prórroga se utilizou como un mecanismo para aumentar o seu valor no mercado".
