O PSdeG reclama á Xunta que aplique o novo decreto estatal de comedores saudables e sustentables en Galicia
Pide dar prioridade ao consumo de produtos de proximidade, sobre todo nun contexto marcado pola ameaza de novos aranceis de EEUU
Por Europa Press / Redacción | Compostela | 17/04/2025 | Actualizada ás 15:37
A deputada do Grupo Socialista no Parlamento de Galicia, Patricia Iglesias, anunciou unha nova batería de iniciativas parlamentarias para garantir que os comedores públicos dependentes da Xunta dean prioridade ao consumo de produtos de proximidade.
A proposta chega dous días despois de que o Goberno aprobase en Consello de Ministros o Real Decreto de Comedores Escolares Saudables e Sustentables, que introduce esixencias sobre o tipo de alimentación que se debe ofrecer nos centros educativos, eliminando a pastelería industrial e obrigando a servir pescado varias veces por semana, entre outras medidas.
"Non hai máis escusas. O Goberno de España vén de aprobar unha norma que pon a saúde dos nenos e nenas por diante e que aposta polos produtos de tempada e proximidade. Galicia ten a oportunidade de unirse a este cambio, pero para iso a Xunta ten que actuar con responsabilidade", defendeu Patricia Iglesias. A deputada socialista lembrou que o pasado 20 de febreiro o Parlamento galego aprobou por unanimidade unha iniciativa do PSdeG instando á Xunta a impulsar este modelo de alimentación nos comedores públicos.
"Todos os grupos estivemos de acordo: había que apostar polos nosos produtos e pola alimentación saudable. Pero desde entón non vimos avances por parte do Goberno galego. E agora que o marco estatal xa está aprobado, é o momento de actuar", sinalou.
AMEAZA DE NOVOS ARANCEIS DE EEUU
A deputada tamén advertiu sobre o contexto internacional, marcado pola ameaza de novos aranceis nos intercambios comerciais con Estados Unidos. "Nun momento no que o proteccionismo volve estar sobre a mesa, temos que ser capaces de blindar o noso. Non podemos deixar nas mans de terceiros algo tan esencial como a alimentación. A compra pública ten que ser unha ferramenta de defensa do produto galego", animou.
A través desta nova batería de iniciativas, Patricia Iglesias propón a aprobación dunha Estratexia Galega de Contratación Pública, que estableza que en todos os comedores públicos dependentes da Xunta se introduzan cláusulas nos pregos de contratación que garantan o consumo do 45% de produtos de tempada e proximidade e que polo menos o 5% do orzamento destínese a alimentos de produción ecolóxica.
