O Indicador Abanca-Foro de Conxuntura Económica sinala que a actividade económica crece en Galicia un 3% en abril

O Indicador Abanca-Foro de Conxuntura Económica de Galicia rexistrou no mes de abril un incremento interanual do 3%. Este valor, segundo sinalan desde a entidade, coincide co do mes de marzo, á vez que é unha décima superior ao alcanzado no principio do ano.

Ademais, o segundo trimestre do ano confirma as "previsións optimistas" coas que comezase 2024, "dando mostra dun comportamento da actividade económica mellor das expectativas coas que finalizou 2023". Nesta liña, o Foro Económico de Galicia destaca que estes meses servirán para marcar o comportamento do primeiro semestre, nun contexto "onde as principais institucións están a revisar á alza as súas expectativas de crecemento".

Sobre a evolución individual das variables recollidas no Indicador, explica que nove de 15 mostran un crecemento positivo (unha máis que o mes pasado). Entre elas, valora o comportamento das afiliacións á seguridade social que no mes de abril experimentou un incremento superior ao 10% interanual, "reflectindo a tendencia favorable das magnitudes do mercado laboral galego".

No lado oposto, destaca negativamente a produción de vehículos turismos, que descendeu máis dun 10% en termos interanuais. Este descenso, explica, "pode ser interpretado como un sinal de alarma da automoción en Galicia marcada polos obstáculos e incertezas en canto ao futuro deste sector estratéxico".

Presentación do I Foro Inventa a túa comunicación, impulsado por Abanca | Fonte: EP