Este rapaz de Negreira é coñecido por ser "influencer de festas" e autopublicar un libro con anécdotas

"Hoxe actuamos en...", é posible que xa escoitaras esto no teu 'Para ti' de Tik Tok facendo referencias ás festas galegas. Pablo Godón, máis coñecido como @pablogodanza nas redes sociais, onde este rapaz de Negreira conta con máis de 26.000 seguidores en Tik Tok. A súa aventura en redes nace durante a pandemia onde xa tiña "Instagram e Twitter" porque recoñece sempre lle gustaron, pero non comezara con Tik Tok. Por aquel entón comezou a subir vídeos co título "Tik Tok Galicia" e con momentos míticos de humor, na televisión principalmente, que galegas e galegos recoñecerían en todos lados como o de "e comprouno, que traballo lle vai dar" ou o "jalowei" dunha señora que non entende que se fale tanto inglés". Ía agrupando por capítulos superando a centena e moitos se fixeron virais con ata máis de 200.000 reproducións nun momento onde a xente precisaba vídeos de humor ante a situación. "Parecíanme graciosos e que se identificaban con como son, pero chegou un punto no que quixen facer outro tipo de contido xa que con iso non aportaba un valor como tal", explica Pablo, que logo comezou a subir vídeos probando comida ou agora apostando por divulgar festas. 

O boom de seguidores experimentouno nesa época, a finais de 2020 con estes vídeos que subía ao seu perfil e que "repercutiron en popularidade". A partir de aí, outros vídeos do estilo "Probando todas as hamburguesas famosas de Vigo", tamén conseguiron ter alcance porque a xente comentaba se non coñecían os sitios, recomendaba outras ou amosaba o seu desexo de probar tamén.

Para Pablo definir o seu público é difícil porque considera que o seu contido é "bastante heteroxéneo" e que podería ser aquela persoa que se parece a el: "Son unha persoa extrovertida e sen moita vergoña". Porén, tamén hai outro tipo de público ao que lle gusta dirixirse e que valora a forma que ten de contalo, con naturalidade e espontaneidade. Ten xente de aquí e de fóra, que tanto pode amosar ganas de coñecer Galicia como comentar o mítico "no entiendo lo que dices". Os seus vídeos son no galego que se fala "na súa zona" en Negreira ou Santa Comba, cos trazos dialectais propios e castelanismos. "Non é un galego normativo e tampouco teño ganas de cambiar a miña forma de contar as cousas", afirma. 

FACÍA FALTA UN INFLUENCER DE FESTAS

De onde vén ese concepto de 'Influencer de festas'? "É gracioso, resulta que viña subindo menos vídeos por mor de ter pouco tempo e, agora no verán xa con máis marxe, dixéronme que xa que me gustaba moito ir de festa por que non dicía a onde ía para poder atoparse". Recoñece que o que máis lle gusta é o feito de socializar e compartir con outra xente de diversos puntos da xeografía galega. "Ante a petición, dixen, en Galicia temos unha cultura de festas e fanse moitos vlogs de viaxes ou lugares, pero non hai unha persoa que suba vídeos das festas que temos", sinala e así empezou o de subir vídeos coa cabeceira de: "Hoxe actuamos no Arde Lucus, nas festas de Santa Comba...".

A cousa non quedou só en dicir a que festa ía, senón que de aí xurdiu outra idea, que explica: "A partir de decembro, cun amigo, fixemos grupo Whatsapp, no que cada vez que iamos de festa e nos atopabamos con alguén e falabamos, dicíamoslle si se quería unir ao grupo chamado Cena de xente, no Instagram @cenaxente". Desta maneira con esa xente que coñecían de celebración xeraron un espazo no que compartir festas ás que ían e no que a día de hoxe son máis de 400 persoas. "Temos a intención de facer unha cea de Nadal para atoparnos de novo, xa que tanto hai xente de Muxía como da Fonsagrada, é moi diverso". 

FESTAS NAS QUE ACTUOU E NAS QUE ACTUARÁ ESTE VERÁN

No que vai de verán, Pablo e amizades, actuaron xa nas festas de Santa Comba, vila próxima; no San Xoán do que destaca a parte máis cultural das cacharelas, sardiñas e churrasco; i en xa dous festivais, o Son do Camiño e o Portamerica. Unha data e celebración sinalada é a das festas en Negreira porque ao final xúntase "familia e xente da vila á que non soes ver todo o ano". 

Proximamente, conta con ir ao festival das Carrilanas de Esteiro; manifesta ter moitas ganas da Festa da Dorna en Ribeira á que nunca foi porque "ía ao Apóstol en Santiago"; e á Festa da Barca en Muxía. E a xente de festa, recoñécete? "Aínda hai xente que si, non 500 persoas, pero igual 50 en todo o ano, que me vén e me di 'es ti o do Wrapped amoroso?' sobre todo deste último vídeo que se fixo viral e do que me expresaron que lles gustou". Este vídeo consiste nun repaso do que foi o ano de Pablo no plano amoroso, tirando de retranca: "Chavalitas coas que papei? Cero, ya está". 

UN LIBRO DE ANÉCDOTAS COA FESTA PRESENTE

Semella que Pablo é unha caixa de sorpresas porque contaba que a xente non só o coñece polo tema redes senón porque lle deu por autopublicar un libro durante a corentena, dispoñible en Amazon e que titulou Cousas que non son cousas."Aínda que non son moito de ler, gústame escribir de esas cousas que me pasan ou se me veñen á cabeza, como pode ser a receita dunha pizza ou unha anécdota de festa, ao final todo está relacionado coa festa", comenta mentres ri. Saíu á luz en xullo de 2020 e encargouse da portada, xa que é amante da fotografía, fixo a maquetación e buscou como poder autopublicalo. Como punto diferencial é que está escrito da mesma maneira na que el fala, ten unhas 122 páxinas e uns 30 mini capítulos con títulos como A aventura do tren negreira-Vigo: "Tamén conta cun glosario, no que de xeito irónico vou traducindo esas palabras que teóricamente estaban mal empregadas". 

Podería semellar que se dedica ás Letras, pero nada máis lonxe da realidade, estudou en Vigo a carreira de Administración en Dirección de Empresas e fixo tamén un mestrado en Responsabilidade Social. Porén, iso non supón un impedimento para crear contido ou escribir un libro e xa leva tempo escribindo o que será o segundo libro: "Sería o Cousas que si son cousas, con capítulos que me sobraron e que levo escribindo desde 2021. O meu desexo é facer unha triloxía". 

Non quere esquecerse de facer fincapé en que as verbenas en Galicia son parte da cultura porque moitas se veñen facendo de tempo atrás. "Festas como a da Barca en Muxía ou da Dorna en Ribeira, teñen eso que definiría como arraigo", sentenza.