Marta Novoa será proposta por Luís Menor como vicepresidenta do PP de Ourense
Será no 19º Congreso Provincial extraordinario da formación, este mesmo sábado 13 de xullo.
Por Europa Press / Redacción | OURENSE | 11/07/2024 | Actualizada ás 16:00
O candidato á presidencia do Partido Popular de Ourense, Luís Menor, proporá no 19º Congreso Provincial extraordinario da formación, este mesmo sábado 13 de xullo, a Marta Novoa Iglesias como nova vicepresidenta dos populares ourensáns. Así o trasladou mediante un comunicado no que afirma que Marta Novoa "demostrou unha ampla capacidade de traballo", na que destaca a súa experiencia como xestora desde o ámbito local, posto que é alcaldesa de San Cibrao das Viñas; pero tamén o seu paso polo Parlamento de Galicia e a súa experiencia política, xa que na actualidade é vicepresidenta da Deputación Provincial que preside Luís Menor.
Para o candidato, a presenza de Novoa na vicepresidencia "permitirá multiplicar a actividade do partido, así como a presenza do PP na sociedade ourensá". Considera que Marta Novoa, xunto con Sandra Quintas quen será proposta para a Secretaría Xeral, "constitúen o exemplo perfecto da nosa aposta polo municipalismo, o alicerce fundamental da fortaleza do PP".
Pola súa banda, Marta Novoa expresou o seu agradecemento polo que considera "unha demostración de confianza" que promete "devolver con compromiso de traballar polo partido e pola provincia". Marta Novoa Iglesias é graduada en enxeñaría industrial mecánica, aínda que está involucrada na política desde hai moitos anos. Entre 2011 e 2015 foi a segunda tenente alcalde do concello ourensán de San Cibrao das Viñas e desde 2015 a primeira tenente de alcalde.
En 2023 encabezou a lista do PP neste concello e conseguiu a maioría absoluta coa que goberna actualmente. Entre medias foi deputada no Parlamento de Galicia desde o ano 2016 e ata xuño do 2023, sendo vicepresidenta da comisión de infraestruturas e medio ambiente e pasando máis tarde a ocupar a presidencia e portavocía da comisión de industria e enerxía. A maiores, en 2022 tamén foi viceportavoz do grupo parlamentario do PP.
