Besteiro di que Galicia deixa de percibir 400 millóns por culpa do PP: "Feijóo e Rueda sáennos caros aos galegos"
O secretario xeral do PSdeG criticou a decisión dos populares de evitar a aprobación dunha medida que "terá graves consecuencias para a comunidade".
Por Europa Press / Redacción | SANTIAGO DE COMPOSTELA | 24/07/2024 | Actualizada ás 15:09
O secretario xeral do PSdeG, José Ramón Gómez Besteiro, reprochou ao PP que a falta de apoio á senda de estabilidade dos orzamentos do Estado proposta polo Goberno central fai que Galicia deixe de percibir 400 millóns. "Unha vez máis, Feijóo e Rueda sáennos caros aos galegos", sostivo.
En declaracións aos medios antes de participar no acto de entrega das Medallas de Galicia, Besteiro criticou a decisión dos populares de evitar a aprobación dunha medida que "terá graves consecuencias para a comunidade". "Galicia vai deixar de percibir máis de 400 millóns de euros entre o 2024 e o 2026".
O xefe de filas do PSdeG sostivo que o PP bloquea "unha vez máis" outra iniciativa que beneficia ao conxunto da cidadanía, como ocorreu coa redución do IVE aos produtos básicos. "Agora, a perda de fondos vai ir directamente contra os servizos públicos", asegurou antes de insistir en que "cada decisión que toman Feijóo e Rueda para oporse a todo o que fai o Goberno de España ten consecuencias malas para os galegos e galegas", dixo.
