A Xunta liquida unha "serie de erros" que excluíu das listas de contratación a profesores interinos
A CIG cifra en 2.200 os afectados e Educación redúceo a 200. A Xunta traballa para publicar unha correccion de erros.
Por E.P. | Santiago de Compostela | 30/07/2024 | Actualizada ás 19:21
A Consellería de Educación publicou o pasado venres a lista de contratación de profesores interinos para a cobertura de prazas deste curso escolar, un documento do que unha "serie de erros" excluíu a parte dos candidatos, 2.200 segundo a CIG, 200 segundo a Administración. A situación, segundo a Xunta, está xa "liquidada" e trabállase na publicación dunha corrección de erros coa lista definitiva.
O sindicato CIG enviou estes días unha comunicación alertando da situación, chamando ás posibles persoas afectadas a polo en coñecemento da Xunta. O habitual, segundo explicaron a Europa Press fontes da CIG, é que nestas listaxes queden excluídas algunhas persoas de forma puntual, por non cumprir os requisitos de matrícula en oposición.
Con todo, nesta ocasión, ao ver que os excluídos eran 2.200 profesores interinos, segundo as cifras que manexa o sindicato, "rendeu o pánico" entre os docentes que comprobaron que non estaban incluídos nas listas. Esa mesma xornada do venres publicouse unha adxudicación provisional de prazas que, apunta a CIG, non pode tomarse como válida tendo en conta que está realizada en base ás listaxes erróneas.
Segundo detectou este sindicato, que trasladou todas as reclamacións, "centos", que recibiron de persoas afectadas á consellería, a maior parte das exclusións afectan a persoas que figuran en listas de distintas especialidades e que non se presentaron ás oposicións dalgunhas delas.
Desde a CIG apuntan que, segundo trasladoulles a Administración, xa se está liquidando o erro. O sindicato urxe este paso, tendo en conta que o día 2 de agosto, este venres, está prevista a publicación de destinos definitivos e, lembran, un erro nestes podería derivar en "reclamacións patrimoniais" das persoas afectadas.
Ademais, en aras dunha maior transparencia e para clarificar a situación, a CIG reclamou á Xunta que, antes do venres, publique de novo as listaxes de contratación con todos os incluídos, de modo que os afectados poidan coñecer a súa situación e reclamar se o consideran necesario.
