A directora xeral Lara Meneses visita un campamento xuvenil e subliña a importancia do lecer alternativo
A directora xeral de Xuventude destaca o retorno das actividades para persoas de 18 a 30 anos dentro da campaña 'O teu mellor verán'.
Por E.P. | Santiago de Compostela | 09/08/2024 | Actualizada ás 18:48
A directora xeral de Xuventude, Lara Meneses, visitou este venres no municipio coruñés de Cabana de Bergantiños 'Aventuras en Cabana', un dos cinco campamentos dirixidos especificamente ao tramo de idade de entre 18 e 30 anos, e sobre os que destacou que foron recuperados este ano polo Goberno galego "para que a mocidade desta franxa de idade conte con propostas alternativas de lecer saudable".
Tal e como trasladou a Xunta nunha nota de prensa, Lara Meneses lembrou que estes campamentos forman parte da campaña 'O teu mellor verán' da Consellería de Cultura, Lingua e Xuventude. En concreto, esta actividade ofrece 200 prazas para poder gozar de propostas de lecer alternativo.
Deste xeito, as persoas que superan a maioría de idade teñen á súa disposición, desde o pasado mes de xullo e durante todo agosto, cinco instalacións diferentes nas que realizar rutas, actividades artísticas, acuáticas ou de multiaventura.
A directora xeral de Xuventude sinalou que, ademais das que se ofrecen neste albergue de Cabana de Bergantiños, estas actividades tamén se desenvolven no campamento A Devesa en Ribadeo, albergue xuvenil de Allariz, albergue Montañas de Trevinca na Veiga e complexo Cemar en Mondariz Balneario.
