O BNG acusa á Xunta de destinar 90 millóns a contratos con empresas "amigas" do PP

O BNG avanzou que lanzará unha "ofensiva parlamentaria" no arranque do curso político para demandar explicacións sobre o "cúmulo de irregularidades" que aprecian na forma de contratación pública da Xunta, marcada, segundo os nacionalistas, polo "trato de favor, o amiguismo e o nepotismo para beneficiar a determinadas empresas" asociadas a "familiares" de cargos do PP.

Así o manifestou o viceportavoz da formación frontista na Cámara autonómica Luís Bará durante unha rolda de prensa celebrada este luns no Pazo do Hórreo, onde anunciou a presentación dunha batería de iniciativas co obxectivo de que a Xunta sexa "transparente" coa súa forma de contratar, especialmente con aquelas empresas con "vínculos" con responsables do Partido Popular.

"Se non hai nada que ocultar, que problema hai en enviar información e comparecer no Parlamento?", preguntouse Bará, que acusou ao presidente da Xunta, Alfonso Rueda, de aplicar "a lei do silencio e da ocultación" para "tapar as irregularidades" cometidas durante a etapa de Alberto Núñez Feijóo en San Caetano e posteriormente coa súa substitución.

Segundo Bará, durante estes anos "adxudicáronse contratos por valor de máis de 90 millóns de euros a empresas amigas", polo que os nacionalistas demandarán na próxima xunta de portavoces que dentro dunha semana dará forma ao primeiro pleno tras o parón estival que compareza Rueda na sesión inaugural do curso político.

A maiores, o Bloque rexistrará iniciativas para esixir ao Goberno galego que remita aos grupos a documentación sobre determinados procesos "que se ocultan" ao Parlamento polo "veto" de Rueda a que se coñezan os detalles sobre a adxudicación de contratos "millonarios" con compañías con "vínculos" co PP como Universal Support, Sibucu ou Mape Asesores.

CONTRATOS CON EULEN

Bará asegurou que o Bloque demandou a través do regulamento do Parlamento e, mesmo, chegou a presentarse na sede da Xunta para reclamar que se lles facilitase a documentación sobre estes contratos con compañía "con vínculos" co PP, pero negóuselles; polo que volverán "reiterar" a súa esixencia de "transparencia" con estes e cos contratos coa empresa Eulen.

Neste sentido, o viceportavoz nacionalista puxo o acento na necesidade de que exista "unha auditoría independente" sobre os contratos asinados pola Xunta con este grupo empresarial do que, como subliñou, é directiva Micaela Núñez, irmá do actual líder do PP e expresidente galego.