BNG buscará "ata as últimas consecuencias" coa comisión de investigación sobre Eulen, o Cunqueiro e a pandemia
"Unha comisión para sacar á luz o que o PP quere manter na escuridade", sostivo Ana Pontón.
Por Europa Press / Redacción | Santiago de Compostela | 14/09/2024 | Actualizada ás 14:13
A portavoz nacional do BNG, Ana Pontón, deixou claro que a súa formación buscará "ata as últimas consecuencias" cun programa de traballo "exhaustivo e rigoroso" na comisión de investigación parlamentaria no Pazo do Hórreo sobre os contratos da Xunta na pandemia, a relación coa compañía Eulen e o custo do Hospital Álvaro Cunqueiro de Vigo.
Pontón lanzou esta mensaxe durante a súa intervención no Consello Nacional do BNG, celebrado en Teo onde puxo en valor que a representación parlamentaria do Bloque, con 25 escanos, permitise á formación "sortear o vergoñoso veto do PP a que exista luz e taquígrafos sobre como se utilizaron os recursos públicos". "Unha comisión para sacar á luz o que o PP quere manter na escuridade", sostivo.
Neste sentido, destacou que con este órgano parlamentario buscarán investigar "os contratos a dedo con empresas vinculadas a altos cargos do PP, empezando polo propio expresidente da Xunta, Alberto Núñez Feijóo".
"Para investigar todos os contratos de emerxencia durante a covid, contratos con empresas que deron auténticos pelotazos no medio da dor e o sufrimento da pandemia", afirmou, antes de citar tamén a necesidade de "investigar o sobrecusto de 470 millóns na construción privatizada do Hospital de Vigo baixo o mandato de Feijóo".
Pontón incidiu en que a formación irá "ata as últimas consecuencias", cun programa de "traballo" e de comparecencias "exhaustivo e rigorosos", entre as que están "tanto a de Rueda como a de Feijóo".
Respecto diso, volveu a sinalar que sería "non só unha declaración de culpabilidade, senón tamén un desprezo absoluto aos galegos e galegas" que Rueda e Feijóo non acudisen a comparecer neste órgano parlamentario.
