Rueda denuncia falta de criterio na repartición de migrantes: "isto non pode resolverse a base de parches"

O presidente da Xunta, Alfonso Rueda, censurou as "distribucións en aluvión sen criterio" de migrantes e advertiu de que "o lóxico" sería que houbese unha reunión das comunidades co Goberno central para realizar "unha planificación previa" e poder darlles "un trato humanitario" e "á altura da traxedia que están a vivir".

A preguntas dos medios en Arbo, en relación á petición de solidariedade do presidente do Goberno de Canarias, Fernando Clavijo, o presidente galego subliñou que Galicia "sempre" cooperou e acolleu migrantes, pero advertiu que, para "seguir sendo un país acolledor, igual que os galegos foron acollidos cando tuvierno que emigrar" no pasado, é preciso "unha planificación e unha organización".

"Levamos tempo dicindo que isto non pode resolverse a base de parches, que non pode ser que cada vez que hai un aluvión o Goberno central cre que o resolve simplemente sacándoos dos sitios onde chegan, de Canarias especialmente, e distribuíndoos eu creo que sen ningún criterio por toda a xeografía de España. Isto hai que facelo doutra maneira", esixiu o tamén líder do PP galego.

Así as cousas, advertiu que "o lóxico" é que se produza unha reunión do Goberno coas comunidades. Dar este paso, prognosticou, evitará "moitos problemas" e facilitará "que as cousas saian ben".

Non en balde, Rueda afirmou que hai que "acoller á xente que necesita ser acollida" e subliñou que España é "un país con problemas demográficos e falta de man de obra nalgúns sectores", antes de insistir na necesidade de planificación. "Isto ben organizado é beneficioso para todos", apostilou.

URXE O ENCONTRO

Con todo, queixouse de que el só recibe información a través do delegado do Goberno en Galicia, Pedro Branco, "sempre parcial e sempre no último momento, con números moi variables". Precisou que entende que lle traslada "a que lle dan" a el, pero agregou que o que evidencia é que o Goberno "non ten ningunha intención" de resolver o problema "de forma ordenada".

Por iso, manifestou que ve "urxente" que o Goberno reúna ás comunidades para trasladarlles "exactamente cal é a situación" e detallar que se vai a facer para "planificar a inmigración en orixe, como vai ser tamén a chegada destas persoas, tanto de maiores de idade como de menores acompañados".

O obxectivo último, advertiu, é que as comunidades poidan acoller e dar aos migrantes "o trato que merecen". "Son persoas e merecen un trato humanitario e á altura da traxedia que están a vivir, pero así vai ser moi difícil prestarllo", resolveu.

Rueda, durante a visita a unha adega este luns.. Xunta de Galicia | Fonte: Europa Press