A Xunta evita aclarar se fará gratuíta a AP-9 se é transferida: "Xestionarémola o mellor posible"

A conselleira de Vivenda e Infraestruturas asegurou que PSdeG e BNG prometeron a "gratuidade da AP-9" durante a campaña electoral dos comicios autonómicos polo que instou a ambas as formacións a "cumprir o comprometido". A integrante do Goberno galego pronunciouse deste xeito ao ser preguntada polo ofrecemento do alcalde de Pontevedra, Miguel Ángel Fernández Lores, ao seu homólogo en Vigo, Abel Caballero, para constituír unha "fronte común" para esixir ao Gobeirno que a AP-9 sexa gratis entre ambas as cidades. Preguntada respecto diso, a conselleira lembrou que a Xunta e o Parlamento de Galicia (por unanimidade dos grupos) leva solicitando máis de 15 anos o traspaso desta infraestrutura para que poida ser xestionada directamente por Galicia.

Durante a campaña, a maiores desas solicitudes, segundo indicou, desde o BNG e o PSdeG "comprometéronse á gratuidade da AP-9" polo que ironizou sobre esta reunión de alcaldes para demandar "algo que xa tiñan comprometido en campaña". "Desde logo, desde o executivo esiximos aos partidos da oposición que cumpran o comprometido en campaña", subliñou. Dito isto e preguntada sobre se a Xunta optará pola gratuidade se a vía é finalmente traspasada á Xunta, asegurou que a Xunta "sempre xestiona" as súas vías da "mellor forma posible", feito polo que optou polo rescate de catro autoestradas da súa titularidade que tiñan peaxes en sombra. "Unha vez que se produza a transferencia, xestionarémola o mellor posible, e se é posible a rebaixa de peaxes ou a gratuidade, así o faremos", indicou.

A ALCALDESA DA CORUÑA APELA Á "VISIÓN INTEGRADORA" E NON "LOCALISTA"

Sobre o tema, a alcaldesa da Coruña, Inés Rey, apelou a unha "visión integradora" e non "localista" para reclamar a gratuidade de toda a AP-9, ao ser preguntada polo posicionamento dos gobernos locais de Vigo e de Pontevedra en relación ao tramo entre ambas as localidades. A preguntas dos xornalistas, manifestou que respecta todas as posicións políticas pero argumentou que se trata dunha cuestión que hai que vela "desde unha óptica global porque vertebra Galicia e ás dúas áreas económicas máis potentes", dixo en referencia á cidade herculina e Vigo. "Creo que desde o punto de vista localista non se vai conseguir nada, non podemos facer galegos de primeira ou de segunda e unha Galicia a dúas velocidades", sentenciou.