Galicia presenta o seu recurso de inconstitucionalidade contra a lei de amnistía

O Goberno galego tamén rexistrou o seu recurso de inconstitucionalidade contra a lei de amnistía este luns, xornada na que tamén o fixeron os executivos de Andalucía, Aragón, Comunidade Valenciana, Madrid e Murcia (todos eles gobernados polo PP) e o de Castela A Mancha do socialista Emiliano García Page. A presentación do recurso desde Galicia, confirmada por fontes do Goberno autonómico, foi aprobada o pasado luns 2 de setembro na primeira reunión tras o 'parón' de agosto.

Como sinalou entón o presidente da Xunta, Alfonso Rueda, o recurso susténtase nos ditames favorables do Consello Consultivo e da asesoría xurídica da Administración autonómica. A "arbitrariedade da lei", a "quebra do principio de igualdade territorial, xurídica e económica" e a "vulneración da separación de poderes" son algúns dos argumentos que, en palabras de Rueda, hai para que a Xunta decidise interpor este recurso ante o Tribunal Constitucional.

"Sempre dixemos que Galicia actuará con toda a contudencia cando pensemos que hai normas que atentan contra os seus intereses, como é o caso", aseverou hai unha semana o mandatario galego. A argumentación que emprega o Executivo galego parte da consideración da súa asesoría xurídica, que entende que a lei de amnistía "contradí" artigos da Constitución Española como o 9.1, que marca que "todos" os cidadáns e poderes públicos estarán sometidos á Carta Magna e o resto de ordenamento xurídico.

Outro dos aspectos que a Xunta argumenta para levar o texto ante o Constitucional é a apreciación de que a súa aplicación "deixa sen efecto decisións firmes adoptadas polo poder xudicial" e "creba o principio de seguridade xurídica" ao actuar un ámbito "amplo e indeterminado". Este mércores 11 de setembro finalizaba o prazo para interpor recursos, tendo en conta que a Lei de Amnistía fixa tres meses para poder impugnar a norma desde a súa publicación no Boletín Oficial do Estado (BOE), que tivo lugar o pasado 11 de xuño.

SEIS CC.AA. DO PP E PAGE

Este luns foron seis as comunidades autónomas do PP que acudiron á xustiza: Andalucía, Aragón, Comunidade Valenciana, Madrid e Murcia, ademais de Galicia. A elas sumouse o goberno autonómico de Castela-A Mancha, liderado polo socialista Emiliano García-Page, tamén presentou de maneira telemática o recurso de inconstitucionalidade contra a lei de Amnistía. Page foi un dos 'baróns' socialistas que se mostraron desde o inicio contrarios á norma pactada por Pedro Sánchez cos independentistas e xa no mes de maio anunciou a súa intención de acudir ao Tribunal Constitucional ante o que considera "unha agresión ao concepto de igualdade".

Consello da Xunta do 2 de setembro de 2024 presidido por Alfonso Rueda | Fonte: XUNTA