Por Europa Press / Redacción | SANTIAGO DE COMPOSTELA | 10/09/2024 | Actualizada ás 10:53
O BNG empregará o seu peso no Parlamento galego para activar unha comisión de investigación sobre os contratos da Xunta con empresas como Eulen ou o suposto sobrecusto da construción do hospital Álvaro Cunqueiro sinalado polo Consello de Contas.
Así o avanzou a portavoz nacional do Bloque, Ana Pontón, durante a súa intervención no debate sobre a posta en marcha desta comisión, que o Bloque levou a votación no primeiro pleno do período de sesións que arrincou na mañá deste martes. A líder frontista anunciou ao termo da súa intervención que empregarán o mecanismo do regulamento da Cámara que outorga capacidade aos grupos con polo menos un terzo dos asentos no hemiciclo do Pazo do Hórreo para crear comisións de investigación.
"Imos usar a forza dos nosos 25 deputados para que se investigue", aseverou Pontón quen, no entanto, convidou ao PP a votar a favor da posta en marcha desta comisión "se non ten nada que esconder". "Se responden cun veto será unha declaración de responsabilidade", dixo.
SEGUNDA VEZ NA HISTORIA
Trátase da segunda ocasión desde a reforma do regulamento no ano 2015 que se empregará o mecanismo que permite crear comisións de investigación sen a aprobación da maioría do pleno. A primeira produciuse na X Lexislatura (2016-2020), cando En Marea, PSdeG e BNG uníronse para, con dous terzos dos 75 asentos do hemiciclo, pór en marcha unha investigación parlamentaria sobre os recortes en sanidade, aínda que a falta de acordo co PP para configuración da lista de comparecentes levaron aos grupos da oposición a desentenderse do desenvolvemento da mesma e organizar unha comisión "paralela".
Agora, o Bloque valerase dos seus 25 deputados, que constitúen un terzo do total da Cámara, para impulsar a comisión de investigación, cuxa creación foi rexeitada este martes polos votos do PP. O seu portavoz, Alberto Pazos Couñago, viu no intento dos nacionalistas unha "importación" e "adaptación á española" da "metodoloxía do réxime de Nicolás Maduro" por parte dos "admiradores do exemplar sistema democrático bolivariano".
PSOE E DEMOCRACIA OURENSÁ, A FAVOR
Pola súa banda, a viceportavoz socialista na Cámara Elena Espinosa incidiu na necesidade de arroxar luz sobre o proceder da Xunta coa contratación de emerxencia ou coa empresa Eulen, así como o sobrecusto de 470 millóns apuntado por Contas no Álvaro Cunqueiro. "A Xunta non pode normalizar o trato de favor con empresas relacionadas co círculo familiar de Feijóo", sinalou Elena Espinosa, que ha recmarcado que "por responsabilidade política, transparencia, ética pública e honestidade" a Administración galega debe ofrecer explicacións sobre estes asuntos. "Os galegos merecen coñecer a verdade", apostilou.
Pola súa banda, o deputado de Democracia Ourensá, Armando Ojea, tamén garantiu o seu apoio á creación desta comisión de investigación porque considera que hai "indicios suficientes" para iso, aínda que mostrou os seus receos acerca da súa utilidade final. "Nunca se fixo unha estatua a unha comisión de investigación porque nunca serviu para nada", chanceou o único integrante do grupo mixto.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.