Aparatoso accidente na AP-9 deixa un coche envorcado e provoca grandes retencións á altura de Padrón

A media mañá deste mércores 11 de setembro un accidente de tráfico na AP-9 colapsou a circulación na AP-9 ao seu paso por Padrón, á altura do quilómetro 83 en dirección Santiago. En concreto, tratouse dun choque contra a mediana que rematou cun coche envorcado e dúas mulleres feridas. Segundo informaron a Europa Press fontes do operativo, o suceso tivo lugar sobre as 13.30 horas.

Dúas mulleres resultan feridas nun accidente de tráfico na AP-9, en Padrón | Fonte: CONSORCIO PROVINCIAL DE BOMBEIROS A Coruña

Segundo detallaron os efectivos de emerxencias na zona e o 112 Galicia, unha das mulleres non podía saír polos seus propios medios e tivo que ser excarcerada. O accidente provocou o corte do carril en dirección Santiago, tendo en conta que o vehículo accidentado quedou envorcado sobre a vía. Ao momento, ademais dos Bombeiros, acudiu o GES de Brión, a Garda Civil de Tráfico e o servizo de Urxencias Sanitarias 061, que trasladaron ás dúas feridas ao Complexo Hospitalario Universitario da Coruña.

Accidente na AP-9 ao seu paso por Padrón | Fonte: Grupos de WhatsApp