Un veciño de Marín entrégase á Policía un día despois de dar unha malleira á súa parella e fuxir da casa

Un veciño de Marín entregouse este xoves á Policía Local despois de que na madrugada do mércores propinase unha malleira á súa parella, segundo confirmou o subdelegado do Goberno en Pontevedra, Abel Losada. Este home presentouse voluntariamente nas dependencias do corpo municipal acompañado do seu avogado. Tamén esta mesma mañá a súa compañeira sentimental formalizou a denuncia pedindo que se lle impoña á súa parella unha orde de afastamento.

Os feitos denunciados tiveron lugar na madrugada do mércores nun piso da rúa Ezequiel Massoni. Ante os golpes e as fortes voces que se escoitaban procedentes do interior dun domicilio, os veciños alertaron á Policía Local. Antes de que chegasen os axentes municipais e varias unidades da Policía Nacional que acudiron como reforzo, os familiares da muller entraron na vivenda e rescatárona.

Cando chegaron os policías, "a muller xa estaba fóra do domicilio, xa estaba na rúa acompañada da súa familia e por tanto, o que se fai, segundo o protocolo, é trasladala ao hospital", explicou o subdelegado do Goberno. A vítima tivo que atendida no Servizo de Urxencias despois de recibir varios golpes, segundo ela mesma relatou, a mans da súa parella. Mentres, o presunto agresor estaba encerrado dentro do seu piso e negouse a abrir a porta aos axentes. "O domicilio, como todos sabemos, ou deberiamos saber, é inviolable. Fai falta unha orde xudicial para poder entrar", apuntou Losada.

Entón, os policías marcháronse do lugar, "entendo que para conseguir a orde xudicial que permitiría entrar no domicilio ou deter ao agresor", aclarou o subdelegado. Xa sen a presenza policial, o presunto agresor colleu a súa moto no garaxe e marchou do lugar. Abel Losada defendeu a "irreprochable" actuación policial neste caso "caracterizado pola total profesionalidade e polo absoluto respecto ás leis e aos protocolos de actuación", negando o subdelegado que o sospeitoso "se escapase diante dos narices da Policía".

Controis da Garda Civil e a Policía Local de Marín | Fonte: GARDA CIVIL DE PONTEVEDRA - Arquivo