Concelleiro de Ribadavia detido por presunta violencia machista quedou en liberdade condicional
O edil, membro do goberno popular dirixido por César Fernández, está investigado por un delito de violencia machista e imposéuselle a prohibición de achegarse á denunciante.
Por Europa Press / Redacción | Santiago de Compostela | 18/09/2024 | Actualizada ás 13:01
Un concelleiro do goberno de Ribadavia, que dirixe o popular César Fernández, foi detido e, tras pasar a disposición xudicial, quedou en liberdade e investigado por un suposto delito de violencia machista. Segundo puido confirmar Europa Press, tras avanzar a información 'eldiario.es', o concelleiro foi detido este martes.
J.C.F., edil da capital da comarca do Ribeiro, que os populares dirixen cunha maioría absoluta sustentada por sete concelleiros, pasou na mesma xornada da súa detención a disposición da titular do Xulgado de Instrución número 1 de Ribadavia. Como medidas, segundo as fontes consultadas por Europa Press, impúxoselle a prohibición de aproximarse a menos de 300 metros e de comunicarse coa denunciante. O caso está en instrución e o detido está investigado por un delito de violencia machista.
